Minis lanvironman i eksplik lapros LWMA pour redistribye bann pti kontra netwayaz |08 July 2020
Anvi sitiasyon ekonomik aktyel e kot plizyer pti kontrakter netwayaz zot kontra i sipoze terminen lafen sa mwan Zilyet, minis responsab pour lanvironnman in donn detay lo lapros ki lazans pour zesyon salte LWMA pe pran pour redistribye sa bann kontra netwayaz.
Minis Wallace Cosgrow ti dan Lasanble Nasyonal yer bomaten pour reponn en kestyon lo sa size par manm elekte pour Baie Ste Anne Praslin, Churchill Gill.
Msye Gill ti anvi konnen: Akoz ki minister pa konsider redistribisyon sa bann kontra pour ki plis dimoun ava benefisye avek en lanplwa pour soutenir zot fanmir dan sa letan difisil, si pou annan okenn benefis pour bann dimoun ki perdi kontra an konsideran lefe ki zot in travay pour bokou lannen e si minis ti okouran ki sa bann nouvo kontra ki’n fini ganny donnen pour menm landrwa kot sa dimoun ki’n perdi ti pe fer, pe kout pli ser?
Minis ti eksplike ki lapros ki LWMA pe pran pour redistribye kontra se pour donn kontra avek bann kontrakter ki’n fini gannyen me anmenmtan plas bann kontrakter ki’n perdi kontra lo bann sit ki pe retender me pa ankor ganny nouvo dimoun. Sa i vedir ki en travay detaye pe ganny fer pour revwar balizaz e pri kontra pour asire ki sa ki’n tender e ganny donnen en kontra i kapab antre lo son sit san okenn difikilte. Fodre note ki sa redistribisyon pou enn tanporer ziska omwen lafen lannen letan ki rezilta dezyenm round tender i sorti.
Minis ti dir ki LWMA in reisi termin sa legzersis pour tou semen, bin sites, bus shelter, lans ek sit lanbelisman lo Praslin.
I ti fer resorti ki bann kontrakter lo Praslin pa pour perdi zot travay sa lannen. Lo Mahe menm legzersis in fini ganny fer lo tou sit lanbelisman enkli lo Ile Perseverance, partou dan lavil, lo highway ziska erport.
Minis Cosgrow in dir ki parkont sa menm legzersis pour bann kontra semen, bin ek bus shelters dan bann distrik lo Mahe i pli konpleks alors i pou arive ki serten kontrakter aktyel pou bezwen ganny termin zot kontra akoz i annan en limit lo kantite proze ki ganny met lo tender e sa pou depan lo kantite kontra ki’n deza ganny donnen konpare avek bidze ki mars avek sak proze.
Dan ka netwayaz larivyer, Minis Cosgrow in eksplike ki son minister pa pe konsider redistribisyon sa bann kontra anvi ki kou ki sa pou anmennen lo gouvernman pou tre o.
«An 2018 ti annan en demann par en manm Lasanble pour ki sa bann landrwa i ganny divize ankor pour ki plis bann pti kontrakter i benefisye avek en kontra anba sa progranm netwayaz. Minister ti konsider sa sizesyon me anfezan sa nou’n vwar ki kou progranm netwayaz larivyer ek lanmar in sorti 6.1 milyon roupi par an pour ariv 21.2 milyon par an,» Minis Cosgrow ti dir.
I ti azoute ki pour netwayaz lanmar ek larivyer, lakantite kontra in osi ogmante sorti 14 pour ariv 60, ki en logmantasyon plis ki 400%.
Minis ti azoute ki son minister pe fer son mye pour pa termin okenn kontra anvi sitiasyon ekonomik aktyel. I ti dir kantmenm i pou arive dan serten ka kot redistribisyon pa pou kapab ganny fer e la pou annan kontrakter ki pou vwar zot kontra terminen.
Sa i pou osi leka kot i konsern netwayaz bann lekol e departman lasante me in dir toudmenm ki i annan striktir e loportinite ki gouvernman in met anplas atraver departman finans ek departman lanplwa pour sa bann kontrakter ki trouv zot san en kontra aparti le 1er Zilyet.
Ansa ki konsern benefis pour bann dimoun ki perdi kontra an konsideran lefe ki zot in travay pour bokou lannen, Minis Cosgrow in dir ki i annan en diskisyon lo size merit konpansasyon pour sa bann travayer baze lo demann ki’n soumet avek gouvernman anmenmtan ki fodre note ki sa sekter i touzour reste contract for service ki fer sa demann i bezwen ganny analize o-profon par gouvernman avan ki okenn desizyon i ganny pran.
I ti dir ki toudmenm dan limedya kontrakter ek zot bann travayer ki ganny afekte par en tel desizyon ava kapab ganny abzorbe anba progranm ki SETS pe ofer kot i annan de group spesifik relye avek netwayaz e proze lanvironnman. Pour plis lenformasyon bann kontrakter konsernen i ganny demande pour kontakte landrwa kot zot ti annan kontra avan ki zot kontra ti ganny terminen.
Minis i dir son minister i okouran sa sitiasyon kot kou pou pli eleve pour trwa rezon e sa i:
- logmantasyon dan kantite landrwa pour netwaye,
- kou mendev pour fer sa bann travay ek lezot lozistik ki bann kontrakter pou bezwen in ogmante, frekans netwayaz osi in ogmante pour serten landrwa baze lo demann piblik e lotorite distrik,
- standar/kalite netwayaz ki pa lo nivo ki osi koute.
Ti osi annan plizyer lezot kestyon siplemanter lo sa size ki ti swiv.
Marie-Anne Lepathy