MNA Anse Royale i remersye, felisit bann travayer servis esansyel le 1er Me |02 May 2020
Bann ners, dokter, zofisye lapolis ek lezot dimoun dan servis esansyel ki pe travay lo frontline avek sa pandemi COVID-19 dan distrik Anse Royale osi byen ki bann travayer kot Wellness Centre Les Cannelles in yer resevwar en vizit par manm Lasanble Nasyonal sa distrik, Madanm Sylvianne Lemiel.
«Mon ti zis anvi remersye zot pour zot bon travay ki zot pe fer dan nou distrik. Koman en siny remersiman e gratitid, zot ti ganny ofer en gato e osi rafresisman ki zot ti kapab servi antre zot apre zot lazournen travay.
«Mon ti osi profite pour remersye zot pour tou sa travay ki zot pe fer pandan sa moman difisil e swet zot en bon Lafet Travayer,» Madanm Lemiel ti dir.
Madanm Lemiel i dir sa bann travayer lasante ek zofisye lapolis ti vreman, vreman apresye sa zes solidarite zour sa lafet ki Seselwa i apresye bokou me ki sa lannen malerezman pour premye fwa in ganny selebre dan en fason tre diferan.
In fer resorti ki lapolis sirtouti vreman kontan. Sete zofisye Charles Robinson ki ti aksepte gato lo lapar son bann lezot zofisye e i ti remersye Madanm Lemiel pour pran en pti letan pour vin vwar zot e osi prezant zot avek en gato ek rafresisman pour sa zour enportan.
Zot in eksprim zot lapresyasyon ki distrik avek son MNA i apresye e valoriz zot travay. Bann ners kot Wellness e osi sant lasante Anse Royale ti vreman kontan e zot osi parey bann zofisye lapolis, zot ti remersye Madanm Lemiel profondeman pour sa zes zour lafet travayer ki sa lannen pe ganny selebre dan en fason trankil e diferan ki labitid.
Bann portre i montre Madanm Lemiel pandan son vizit yer kot sa bann servis esansyel dan son distrik.
Marie Anne Lepathy
