Eski Seselwa in fatige reste anfermen? |07 April 2020

Anvi pandemik COVID-19 kot serten restriksyon in ganny met anplas par lotorite lasante piblik pour minimiz propagasyon sa viris, serten dimoun i profit sa lokazyon pour fer serten aktivite ki, petet pour lemoman, pe ganny konsidere pa tro danzere, tel ki ‘jogging’, pour gard lekor an bonn sante.

Yer apremidi Ile Perseverance, en gran nonm dimoun ti pe taye lo semen sorti dan zanviron lakres ‘Trotters Stop’ pour al ver Anse Etoile pres kot bazar e vis versa an pasan par lari Etoile Der Mer. Sa bann ‘joggers’ ti tou laz, adilt konman zanfan. Ti annan ki ti pe tay endividyelman, ti annan osi ki ti pe tay a de ou plis.

En madanm ki pa ti oule devwal son non ti dir avek zournal Seychelles NATION ki vi ki i en travayer ‘day care’ e ki sa in fermen, i profit sa lokazyon pour li degourdi son lekor.

“Pa kapab zis asize kot lakour mon bezwen profite e fer parman avek mon lekor pandan sa letan,” i ti dir.

En lot madanm ki ti avek li ti dir ki toulezour i vin fer legzersis lo sa semen e yer ti premye fwa ki in vwar en kantite dimoun vin taye koumsa.

Avek lakantite dimoun ki pe fer sa kalite aktivite lo larout piblik e zot pe frot zepol ek kanmarad, i reste pour vwar si i konseyab pour kontinyen fer li anvi lakantite dimoun ki’n teste pozitiv pour COVID-19 pe ogmante.

Bann portre ki akonpanny lartik i montre bann ‘joggers’ pe degourdi lekor tar yer apremidi.

Patrick Joubert