Lazournen Enternasyonal Travay Sosyal |17 March 2020
Promouvwar lenportans relasyon imen
Lazournen Enternasyonal Travay Sosyal ti lanse par Federasyon Enternasyonal bann Travayer Sosyal an 1983 e plitar bann lezot lorganizasyon dan domenn travay sosyal ti zwenn ansanm pour mark sa lazournen.
Lazournen Enternasyonal Travay Sosyal in vin en selebrasyon enportan dan kalandriye travay sosyal kot bann travayer sosyal atraver lemonn i selebre e promot bann kontribisyon ki sa profesyon in anmennen pour bann endividi, fanmir, lakominote ek sosyete an zeneral. Sa lazournen i ganny selebre tou le 3enm mardi dan mwan Mars.
Tenm pour Lazournen Enternasyonal Travay Sosyal i ganny fikse pour 2-an baze lo bann bi Lazanda Mondyal pour Travay Sosyal ek Devlopman Sosyal. Sa bann tenm in konm swivan:
• 2012 - 2014: Promouvwar Legalite Sosyal e Ekonomik
• 2015 - 2016: Promouvwar Dignite ek Valer Imen
• 2017 - 2018: Promouvwar en Kominote ek Lanvironnman Soutenab
• 2019 - 2020: Promouvwar Lenportans Relasyon Imen
Tenm pour sa lannen, ki ti osi ganny servi lannen pase, i tre enportan e apropriye, vi ki travay sosyal i annan pour fer avek relasyon imen. Sa i vedir relasyon avek bann dimoun ki depan lo sa servis, relasyon antre zanfan, relasyon antre fanmir, bann partener e antre koleg travay. Sa tenm ti ganny swazir pour ofer sa loportinite e sansibiliz bann pei atraver lemonn pour konsantre lo enterdepandans imen ensi ki konsider nesesite pour sanz bann polisi ek fason delivre servis anver lezot.
I enportan note ki malerezman anmezir ki lavi i evolye, parfwa nou vwar ki dimoun i ezite pour ed enn a lot, menm manm fanmir. Alors, sa tenm i ed nou realiz lenportans relasyon imen e valer en sosyete kot nou siport kanmarad.
Nou kapab dir relasyon imen i labaz travay sosyal. Ler nou pe promouvwar lenportans relasyon imen, nou pe rekonnet drwa ek dignite imen e tret lezot avek respe ek konpasyon. Pour bann travayer sosyal, promouvwar lenportans relasyon imen i osi annan pour fer avek bann sirkonstans kot zot ede idantifye, rekonnet e sanz latitid negativ dan sosyete pour permet en meyer lanvironnman pour tou dimoun.
En kontribisyon Minister Lafanmir