Travay pour agrandi Lekol Eksepsyonnel, Youth Hostel pou konmanse sa lannen |12 June 2019

Travay konstriksyon pour azout en nouvo blok dan ki pou annan de laklas ki ava kapab pran 16 zanfan sakenn e osi en multipurpose room avek Lekol Eksepsyonnel Roche Caiman, i ekspekte konmanse sa lannen.

Sa i ava osito ki tou bann prosedir e detay neseser konsernan sa proze ki pe al lo tender sa semenn i ava’n finalize.

Sete Minis responsab pour Ledikasyon ek Devlopman Resours Imen, Madanm Jeanne Simeon, ki ti donn sa bann detay Lasanble Nasyonal dan sesyon demann kestyon yer bomaten.

Dan sa menm sesyon, Minis Simeon ti osi enform Lasanble ki travay pour konstrir en nouvo blok e fer renovasyon lo sa sis blok kot Youth Hostel Anse Royale ki ti pour fer depi 2017 me ki’n retarde pour plizyer rezon, pou osi konmanse sa lannen.

Sete manm elekte pour La Digue ek Inner Islands, Noline Sophola, ki ti’n demann Minis Simeon pour donn Lasanble en revi lo progre travay renovasyon ki ti sipoze ganny fer kot sa hostel.

Konsernan travay agrandisman Lekol Eksepsyonnel, Minis Simeon ti dir Lasanble ki sa proze in fini ganny laprouvasyon Lotorite Plan e i pou ganny fer an partenarya avek Seychelles Round Table, Children’s Special Fund osi byen ki Minister Ledikasyon ek Devlopman Resours Imen.

“Sa de laklas adisyonnel ava donn ase lespas pour zafan sirkile spesyalman bann ki deplas dan sez roulant. Tandi ki sa multipurpose room li i ava donn en lespas ouver pour fasilit bann aktivite ki deroul dan lasal etandonnen ki serten bann etidyan i annan bann kondisyon medical,” Minis Simeon ti eksplik bann manm.

Sete manm elekte pour Roche Caiman, Audrey Vidot, ki ti’n demann Minis Simeon pour eksplik progre lo sa proze laklas adisyonnel kot sa lekol.

Minis Simeon ti azoute ki sa lasal ava ganny servi konman en gym pour bann zwe, sesyon ledikasyon fizik osi byen ki bann aktivite pour devlop motor skills sa bann zanfan avek dezabilite e i ava osi kapab ranplas en laklas normal si i neseser.                         

“Provizyon in fer pour ki tou bann fasilite dan sa proze i disabled friendly,” Minis Simeon in dir.

In osi fer resorti ki serten travay renovasyon ki ti fer lo sa lekol lannen pase ti enkli met anplas fasilite twalet ek lasal de ben spesyalize ek balistrad dan koridor pour asir sekirite sa bann zanfan.

Parmi bann lezot pwen ki ti leve lo sa size ti enkli fasilite transportasyon bann zanfan vi ki lagrandisman lekol i vedir pou annan plis zanfan. Lo sa pwen Minis Simeon ti fer resorti ki sa lekol i aktyelman annan de bis ki pe ranmas e transport bann zanfan tou le bomaten e si i annan nesesite minister ava konsider rod en lot transpor.

Minis Simeon ti osi reponn plizyer lezot kestyon bann manm an relasyon avek sa lekol osi byen ki lezot lekol tel parey plan pour fer renovasyon konplet lo batiman lekol primer Anse Boileau e pour relev nivo lakour sa lekol pour minimiz inondasyon e osi aranz sistenm drenaz, travay lo de blok ki pe konstrir kot lekol primer ek segonder Grand Anse Praslin. Ti osi annan kestyon lo size allowance ki bann etidyan pos segonder i gannyen.

An sa ki konsern travay lo Youth Hostel, Minis Simeon in dir ki sa nouvo blok pou enn modern avek kapasite 48 lasal letid e i pou osi annan en blok pour ladministrasyon. Travay ti al lo tender le 24 Avril pour bann kontrakter klas limero 1 ek 2 e sa bann tenders ti ouver le 29 Me.

Prosesis evalyasyon i ansemoman an progre e travay i ekspekte al pour 18 mwan ler i konmanse.

Minis Simeon i dir sa bann travay renovasyon i ekspekte donn en nouvo vizaz sa hostel e osi fer li pli agreab pour bann etidyan ki reste laba.

Avek sa bann travay renovasyon tou etidyan pou annan zot prop landrwa letid; konmela zot pe partaze.

Minis Simeon in osi dir ki dan sa sis blok bann meb lasanm fek ganny ranplase e bann lezot fasilite parey dan lasaldeben ek lakwizin zot, zot in ganny amelyore e sa ti anba en proze antreprann lannen pase.

Minis Simeon in eksplike ki sa in ganny retar akoz konstrent bidzeter ek lezot emerging priorities ki minister ti bezwen adrese vitman.

Minis Simeon in dir sa travay pou ganny fer par faz e sa nouvo blok pou konstrir avan pour permet etidyan bouze e liber landrwa pour bann travay renovasyon.

Minis in osi fer resorti ki aktyelman i annan antou 138 etidyan sorti Inner Islands ki pe reste kot sa hostel Anse Royale e ladan i annan sis etidyan ki pe etidye Liniversite Sesel e lezot pe swiv kour dan bann sant profesyonnel.