Kominike Lapolis |19 November 2025
Loperasyon resers pe deroule pour rod de viziter
Lapolis in konmans en loperasyon resers ek sekour pour rod 2 viziter ki’n ganny raporte manke dan santye pour al Anse Capucin, Takamaka.
******
En zonm i ganny desarze lopital swivan tretman apre dife dan en bato
En zonm 55-an sorti La Digue ki ti’n ganny transporte lopital Baie St Anne Praslin Lendi bomaten pour swen medikal dirzans an rezilta en lensidan dife dan en bato dan por Ile Eve, in aprezan ganny desarze lopital.
Dapre rapor inisyal ki lapolis in ranmase, sa lensidan ti ariv pandan letan ki bann manm lekipaz sa bato ti pe pran karbiran. Lapolis ti ganny alerte lo sa lensidan ver 9er 10 bomaten pour lasistans, e en lanket in konmanse.
******
Trwa zofisye lapolis enplike dan en aksidan i ganny trete e desarze
Trwa zofisye lapolis ki ti’n ganny transporte Lopital Sesel Lendi apremidi pour swen medikal, an rezilta en aksidan ki ti’n arive English River, ti resevwar tretman e ganny large Lendi swar menm.
Dapre rapor inisyal ki’n ganny ranmase, sa transpor lapolis ti pe fer direksyon English River o moman sa aksidan kot i ti kit semen. Lapolis ti ganny alerte lo sa aksidan ver 1er 20 apremidi pour lasistans, e en lanket in konmanse dan sa ka.