Kominike Lapolis |29 August 2025
Allan Ah-Kong i ganny sarze e rimann pour vol
Allan Ah-Kong aze 48-an sorti Baie Lazare, in formelman ganny sarze devan Lakour Mazistra Anse Royale dan en ka vol ki ti arive dan en letablisman touristik Pointe Au Sel tou resaman.
Mazistra ti’n enpoz serten kondisyon pour Ah-Kong ganny large. Sa ti enkli pey en kosyon 5 mil roupi, pour pa komet ou ganny sarze avek okenn lofans similer e pandan letan ki i deor i pa devret enterfer avek temwen dan sa ka. I ti pou osi bezwen prezan devan lakour a sak fwa son ka pe ganny ekoute, pour siny liv lakour dan kordgard Baie Lazare 3 fwa par semenn.
Vi ki Ah-Kong pa’n reisi akord demann lakour pour pey sa kosyon 5 mil roupi in aprezan rimann prizon Montagne Posée. Si i arive pey sa kosyon, i pou ganny large e i pour bezwen swiv sa bann kondisyon ki lakour in enpoz lo li.
*******
En sitwayen Britanik i rimann pour lofans drog
En zonm 38-an avek nasyonalite Britanik in pas devan Lakour Siprenm Merkredi bomaten e pe aprezan rimann pour 14 zour an detansyon lapolis, an koneksyon avek en lanket ki lapolis pe fer, pour lofans lenportasyon en drog kontrole.
Sa sispe, ki en zofisye servis tenny dife ek sovtaz, ti ganny entersepte lo erport enternasyonal Sesel, le 26 Out 2025, apre son larive abor en vol Emirates sorti Dubai. Zofisye lapolis ek ladwann ti fer lafouy lo li, e lapolis ti sezi plizyer pake ki zot sispekte ti kontenir en drog kontrole. Sa sispe pou repas devan Lakour Siprenm le 10 Septanm 2025.
******
De zonm i ganny sarze pour lofans vol
Chris Marimba aze 32-an sorti Belonie, ek Rodney Freminot aze 33-an sorti Anse Aux Pins, in formelman ganny sarze devan Lakour Mazistra, Ile Du Port an koneksyon avek en seri ka vol.
Chris Marimba in formelman ganny sarze pour lofans kas lakaz e vole, trespas kriminel e pour an posesyon en zouti ofansiv dan en landrwa piblik. Rodney Freminot li in ganny sarze dan 2 ka – pour lofans kas lakaz e vole, e ilegalman servi en transpor san konsantman son propriyeter.
Mazistra ti’n enpoz serten kondisyon pour larg Marimba. Sa ki i bezwen pey en kosyon 10 mil roupi pour son laliberte provizwar, pour pa komet ou ganny sarze avek okenn lofans similer, pandan letan ki i pou deor lo laliberte provizwar, en restriksyon lo mouvman depi 6er diswar ziska 6er bomaten.
Sa bann kondisyon i aplikab dan tou son bann ka, apard sa kosyon 10 mil roupi, ki li i zis dan premye ka. Vi ki Marimba pa’n reisi akord demann lakour, in ganny rimann prizon Montagne Posée. Si i arive fer sa peyman 10 mil roupi, i pou ganny large, e i pou bezwen swiv sa bann kondisyon ki lakour in enpoz lo li.
Dan ka Rodney Freminot, vi ki semenn pase in fek kondann en term 8 mwan prizon devan Lakour Mazistra Anse Royale, Mazistra in rimann li dan sa enn nouvo ka, ziska dennyen determinasyon dan son ka.