Kominike Lapolis |23 August 2025
Robinson Agnes in kondann 5 mwan prizon devan Lakour Mazistra Anse Royale pour lofans lensilt anver en endividi, avek lentansyon pour denigre li ‘Insulting the modesty of a person’.
Agnes ti komet sa lofans le 12 Me 2021 Anse Royale kot i ti fer en lensilt anver en zofisye lapolis ki ti pe desarz son responsabilite, apre ki i ti’n reponn lapel pour lasistans lo en scene.
******
En zonm 29-an sorti Anse Royale in ganny arete, pas atraver bann prosedir legal, e plitar ganny large. Sa i an rapor avek en lofans kot i ti azir dan en fason neglizan, ki ti lakoz en dife pour detri en gran bout vezetasyon. Lazans Servis Tenny Dife ek Sovtaz ti bezwen entervenir pour tenny sa dife. Sa lensidan ti ganny raporte avek lapolis le 20 Out 2025.
Dan en lot ka separe, ki ti ganny raporte avek lapolis Zedi apremidi dan distrik Glacis, en zonm 73-an in osi pas atraver bann prosedir legal, e plitar ganny large. Sa osi i konsern en lofans kot en dife ti detri en bout vezetasyon akoz aksyon neglizans.
Dan toulede ka, departman Lanvironnman in pran aksyon lo zot kote e sarz sa 2 endividi avek en lanmann.
I enportan note ki restriksyon pour met dife ti antre an fors depi Lendi le 11 Out 2025, e i ekspekte reste an plas ziska lafen Oktob 2025, depandan lo kondisyon letan. Nenport dimoun ki met dife pandan sa peryod pe komet en lofans, e i kapab ganny en lanmann ki sorti ant 500 roupi ziska 1,500 roupi.
Departman Lapolis pe lans en lapel avek tou dimoun pour respekte sa restriksyon pour evit lezot lensidan dife. Sa bann aksyon neglizans i kout bokou resours pour kapab met en dife lafore anba kontrol e i kapab anmenn retar dan bann lezot ka kot dimoun ti a bezwen lasistans imedyat.
******
Shane Tolfree aze 29-an sorti Turtle Bay, Au Cap in kondann 2-an Prizon devan Lakour Mazistra Anse Royale, ki’n ganny sispann pour en peryod 2-an, avek en lanmann 9 mil roupi. Sa i dan ka okazyonn dimal grav en endividi.
Tolfree ti komet sa lofans le 8 Zanvye 2021, kot i ti fizikman agres en endividi ki ti’n trespas son propriyete ilegalman avek lentansyon pour vole.
******
Rhony Baptiste aze 32-an in kondann en term 4-an prizon pour lofans kas batiman, e pour vole en term 2-an prizon, avek en lanmann 6 mil 500 roupi ki i pou bezwen peye avan le 31 Oktob 2025. Sa ti devan Lakour Mazistra Ile Du Port.
Baptiste ti komet sa lofans le 6 Mars 2025 ver 11er diswar kot i ti kas en batiman dan rezyon Perseverance e vol plizyer keksoz.
******
Alwyn Larue aze 24-an sorti Perseverance in formelman ganny sarze devan Lakour Mazistra Ile Du Port pour lofans koz dimal grav en endividi, ki ti ganny raporte avek lapolis le 20 Out 2025, arive kot son rezidans Perseverance.
Mazistra in larg Larue lo plizyer kondisyon tel ki en kosyon 10 mil roupi pour son laliberte provizwar, siny liv Lakour dan kordgard Perseverance 2 fwa par semenn, pour pa enterfer avek konplenan ek temwen dan sa enn ka. Vi ki Larue pa’n reisi akord demann Lakour pour pey sa kosyon 10 mil roupi, i’n ganny rimann prizon Montagne Posée, ziska le 4 Septanm 2025, zour ki i ekspekte repas devan Lakour.
Alwyn Larue ti’n resaman kondannen le 5 Out 2025 devan Lakour Mazistra Anse Royale, dan en ka vol, kot parmi ti en santans 2-an prizon ki ti’n ganny sispann pour en peryod 3-an avek en kosyon 9 mil roupi, ki i ti pou bezwen peye. Mazistra ti’n averti Larue ki pandan son term sispann prizon, ki si i arive komet, ou ganny sarze avek okenn lofans, ki ganny pini par en term prizon, son santans dan sa enn ka pou vin aktiv otomatikman, kot i pou deservi son term 2-an prizon.