Kominike Lapolis |12 March 2025
Lapolis i detenir en madanm konman sispe dan en ka vol
En madanm 25-an sorti Beau Vallon i lo rimann pour 14 zour konman sispe dan 2 ka vol an servan vyolans.
En zonm 57-an ki osi sispe dan sa ka, in ganny large lo serten kondisyon kot i bezwen siny en ‘bail bond’ 10 mil roupi pour asir son prezans devan Lakour a sak fwa son ka pe ekoute, pour pa enterfer avek temwen ek konplenan dan sa ka, remet son paspor avek lakour e siny liv lakour 3 fwa par semenn dan kordgard Perseverance.
Antretan lapolis pe kontinyen avek zot lanket.
******
David Boniface i ganny sarze pour andomaz propriyete ek vyolans
David Boniface aze 42-an sorti Perseverance, in formelman ganny sarze devan Lakour Mazistra pour lofans andomaz propriyete e menas an servan vyolans.
Mazistra ki ti pe ekout sa ka in larg Boniface lo serten kondisyon. Sa i kot i bezwen siny en ‘bail bond’ 8 mil roupi pour asir son prezans devan Lakour a sak fwa son ka pe ekoute, pour pa enterfer avek temwen dan sa ka, pour pa apros konplenan ek son propriyete e pour pa komet ou ganny sarze avek okenn lofans parey pandan letan ki i deor lo laliberte provizwar. I pou osi bezwen siny liv lakour 2 fwa par semenn dan kordgard Perseverance.
Lapolis, atraver prosekisyon, ti anmenn en mosyon devan lakour pour demande ki sa akize i kontinyen ganny garde lo rimann, vi ki i ti’n kas lord ek kondisyon ki Lakour Mazistra ti’n deza enpoz lo li, dan en ka oparavan. Mazistra ti akord demann prosekisyon e rimann Boniface prizon Montagne Posée ziska dernyen determinasyon dan son ka.
******
Lakour i rimann en zabitan Perseverance pour kas batiman e vole
En zonm 32-an sorti Perseverance in yer bomaten pas devan Lakour Mazistra konman sispe dan en ka kas batiman e vole Perseverance, ki ti raporte avek lapolis le 7 Mars 2025.
Sa zonm ti’n deza formelman ganny sarze devan Lakour Mazistra semenn pase le 5 Mars 2025, pour lofans arme avek lentansyon pour komet en lofans, e an posesyon en zouti ofansiv. I ti’n ganny large lo serten kondisyon.
Swivan sa lensidan resan, mazistra in aprezan rimann sa sispe 7 zour an detansyon lapolis.
******
En zonm Anse Louis i lo rimann pour lofans lesey met dife
En zonm 43-an sorti Anse Louis i lo rimann 7 zour an detansyon lapolis konman sispe dan en ka lesey pour met dife (attempted arson) ki ti raporte avek lapolis le 9 Mars 2025. Sa lensidan ti arive Anse Louis kot rezidans enn son fanmiy.
******
Sispe dan ka kas batiman e vole i rimann pour 14 zour
En zonm 35-an sorti Roche Caiman pe rimann pour 14 zour an detansyon lapolis konman sispe dan 2 ka kas batiman e vole ki’n resaman arive lo Lari Latanier.
Antretan lapolis pe kontinyen avek zot lanket dan sa ka kont sa zonm ki pa dan en lanplwa.
******
En zonm pe rimann pour andomaz propriyete
En zonm 26-an sorti North East Point i lo rimann 14 zour an detansyon lapolis konman sispe dan en ka pour andomaz propriyete, trespas kriminel e menas an servan vyolans.
Sa lensidan Ma Constance ti raporte avek lapolis le 9 Mars 2025.
Sa sispe ti’n deza ganny large lo serten kondisyon le 20 Out 2023, par Lakour Mazistra. Kondisyon ti enkli en ‘bail bond’ 8 mil roupi, pour pa angaze dan okenn lofans kriminel oubyen ganny sarze avek okenn lofans parey. Ti osi annan en restriksyon lo son mouvman depi 8er diswar ziska 6er bomaten.
Le 22 Zilyet 2024, sa sispe ti ganny sarze dan en nouvo ka pour lofans andomaz propriyete, menas an servan vyolans e reziste larestasyon, kot la Lakour Mazistra ti larg li lo serten lezot kondisyon ki enkli pey en kosyon 4 mil roupi pour son laliberte provizwar.