Kominike Lapolis |01 March 2025
Paul Philoe i ganny sarze pour lofans lagresyon fizik lo en endividi
Paul Philoe aze 31-an, en zabitan Baie St Anne, Praslin e ki pa dan en lanplwa, in formelman ganny sarze devan Lakour Mazistra Praslin pour lofans lagresyon fizik lo en endividi.
Lapolis, atraver prosekisyon, ti anmenn en mosyon devan Lakour pour demande ki sa akize i kontinyen ganny garde lo rimann.
Mazistra in akord demann Lakour e rimann Philoe prizon Montagne Posée ziska dernyen determinasyon dan son ka.
Philoe ti komet sa lofans le 25 Fevriye 2025 lo Praslin.
******
Julio Issac i kondannen pour lofans vol
Julio Issac aze 30-an sorti Takamaka, in kondannen devan Lakour Mazistra Anse Royale pour lofans vol. Issac ti komet sa lofans le 8 Novanm 2022 dan rezyon Takamaka.
Mazistra ki ti pe ekout sa ka in pran plizyer konsiderasyon avan pas santans lo Issac, tel ki i ankor zenn, i regrete pour sa bann lofans ki i ti’n komet, e in pled koupab a son premye lestan kan in ganny loportinite ki fer i pa’n gaspiy letan Lakour.
Mazistra in kondann Issac en term 2-an prizon, me in ordonnen ki son santans i ganny sispann pour en peryod 3-an. Sa i avek kondisyon ki i pa komet ou ganny sarze pour okenn lofans similer pandan letan ki i deor lo kosyon.
Mazistra in osi enpoz en lanmann 10 mil roupi, ki i pou bezwen peye avan 6 mwan, kot en sonm 4 mil roupi pou al konman konpansasyon pour sa viktim.
******
Jean-Paul Lozaique i kondann 4-an prizon pour vol an servan vyolans
Jean-Paul Lozaique aze 24-an sorti Beolière in kondann 4-an prizon ek en lanmann 25 mil roupi pour lofans vol an servan vyolans.
Lozaique ti komet sa lofans le 9 Oktob 2024 lo lans Grand Anse Mahé, kot i ti servi vyolans pour atak en koup etranze e vol plizyer zot propriyete personnel.
Mazistra in ordonnen ki en sonm 20 mil roupi dan sa lanmann i al konman konpansasyon pour sa viktim.