Kominike lapolis |08 February 2025
Earonn Humphrey i kondannen pour posesyon en drog kontrole
Earonn, Mario Humprey aze 35-an sorti Quatre Bornes, Takamaka in kondann 2-an prizon ek en lanmann 14 mil roupi pour lofans posesyon en drog kontrole.
Me ziz ki ti ekout sa ka in ordonnen ki son santans prizon i ganny sispann pour en peryod 2-an.
Humprey ti komet sa lofans le 10 Mars 2020, Takamaka, kot i ti ganny arete an posesyon 31 plant kanabis ki i ti pe kiltive lo son laferm.
Ziz in pran plizyer konsiderasyon avan pas santans lo Humprey, tel ki in pled koupab a son premye lenstan, ki fer i pa’n gat letan lakour.
****
Mervin Servina i kondannnen pour lofans posesyon avek lentansyon trafik en drog kontrole
Mervin, Rod Servina aze 34-an sorti Anse Boileau in kondann 6 mwan prizon pour lofans posesyon avek lentansyon pour trafik en drog kontrole – 808.8 granm rezin kanabis.
Servina ti komet sa lofans le 26 Zen 2024, kot i ti ganny arete kot son rezidans Anse Boileau.
****
Eugene Valentin i kondann 1-an prizon pour lofans ‘issuing cheque without provision’
Eugene Valentin sorti Mont Buxton in kondann 1-an prizon avek en lanmann 25 mil roupi, e en lanmann 15 mil roupi ki i pou bezwen peye separeman konman en konpansasyon pour sa viktim dan sa ka.
Sa i pour lofans ‘issuing cheque without provision’.
Mazistra ki ti pe ekout sa ka, in ordonnen ki son santans prizon i ganny sispann pour en peryod 2-an.
****
3 zonm i kondann en lanmann 10 mil roupi sakenn pour posesyon lavyann torti
Yvon Didon, Julius Didon e Aubrey Didon sorti Anse Aux Pins in kondannen devan Lakour Mazistra, Anse Royale, pour lofans posesyon lavyann torti.
Sa 3 kondannen ti komet sa lofans le 3 Desanm 2021 apre ki zot ti’n ganny arete abor en bato an posesyon lavyann torti.
Mazistra ki ti pe ekout sa ka in kondann Yvon Didon, Julius Didon e Aubrey Didon en lanmann 10 mil roupi sakenn, ki zot pou bezwen peye avan le 30 Avril 2025.
****
Ian Sirame i formelman ganny sarze pour plizyer ka
Ian Sirame aze 31-an sorti Persévérance e ki pa dan en lanplwa, in formelman ganny sarze devan Lakour Mazistra, Ile Du Port, dan sa bann ka swivan: antre dan en lakaz e vole, lagresyon fizik lo en endividi, kas lakaz e vole, e lagresyon fizik lo en zofisye lapolis.
Lapolis atraver prosekisyon ti anmenn en mosyon pour demann lakour ki Sirame i kontiyen ganny garde lo rimann ziska dernyen determinasyon dan son bann ka. Mazistra ti akord demann prosekisyon e rimann Sirame Prizon Montagne Posée.
****
Priscilla Renaud i formelman ganny sarze pour lofans mert
Priscilla Renaud, aze 41-an ki travay konman en cleaner sorti Persévérance, in formelman ganny sarze devan Lakour Siprenm dan en ka pour lofans mert.
Renaud ti komet sa lofans le 9 Zanvye 2025 kot son rezidans Persévérance.
Lapolis atraver prosekisyon ti anmenn en mosyon pour demann lakour ki sa aprezan akize i ganny garde lo rimann. Ziz ki ti pe ekout sa ka ti ordonnen ki sa akize i ganny garde lo rimann Prizon Montagne Posée pour ankor 14 zour.