Follow us on:

Facebook Twitter LinkedIn YouTube

National Assembly

Lasanble i sispann vot lo bidze pour minister responsab lakaz ek later |21 November 2019

Vot Lasanble Nasyonal lo alokasyon bidze pour Minister Labita, Later, Lenfrastriktir ek Transpor lo Later pour lannen prosenn en sonm R185,103 milyon in sispann tar yer apremidi apre en lazournen deba akoz bann manm i anvi plis leksplikasyon ek leklersisman lo fason sistenm pwen pour distribisyon lakaz ek later i marse.

Laplipar bann manm ki ti kestyonn Minis Pamela Charlette ek son bann diferan sekreter prensipal ki ti’n vin defann zot bidze ti lev sa size konsernan sistenm pwen pour fer alokasyon later ek lakaz e zot in dir ki i ankor annan en mank transparans ek legalite dan fason sa sistenm i marse e ki i ankor annan bokou dimoun ki pe pas par devan lezot e zot pa konpran akoz sa i arive.

Tou bann larepons ki Minis Charlette ek PS pour Labita Denis Barbe ti donnen pa ti konvenk bann manm.

Sete manm elekte pour Mont Fleuri Msye Jean-François Ferrari ek dirizan lopozisyon Msye Wavel Ramkalawan ki ti propoze ki vot lo alokasyon bidze pour sa minister i ganny sispann ziska ler ki Lasanble i satisfe ki sa minister i montre li e donn li leksplikasyon kler ki kapab konvenk li ki sa sistenm i transparan e egal pour tou dimoun parey in dir i ete.

Msye Ramkalawan in demande ki Baie Lazare kot lakaz in fini konplete e dimoun in fini ganny swazir i ganny servi konman sa legzanp pour montre sa latransparans atraver alokasyon pwen.

Ozordi pandan lazournen Minis Charlette ek son bann teknisyen i ekspekte zwenn bann manm Lasanble pour eksplik zot sa prosesis.

Msye Ramkalwan i dir ki enn fwa ki zot konman bann manm Lasanble zot in konpran klerman ki mannyer sa sistenm i marse zot ava kapab etabli si i vreman transparan, zis e egal e zot pou premye pour ankouraz dimoun pour fer konfyans sa sistenm apre tou sa kantite konplent ki piblik in annan vizavi sa sistenm.

Antretan parmi bann lezot kestyon ki bann manm ti leve ti konsern bann diferan proze lenfrastriktir dan bann distrik, nesesite pour met azour servis GIS lo internet, plan sa minister pour ede rezourd problenm konzesyon trafik par get dan posibilite pour acquire bann later kot i neseser pour fer layby e agrandi semen. Minis Charlette i dir sa i nesesit bann diskisyon avek SLTA ek lezot lotorite konsernen.

Problenm asosye avek kominikasyon telefonn ant piblik ek sa minister ki bann manm i dir i ankor en kosmar e zot in demande ki serten konponan sa bidze i ganny servi pour adres sa problenm en fwa pour tou.

Minis i dir ki i annan demars pour adres sa problenm dan son totalite e ki en konsiltan in deza analiz zot sistenm e fer serten rekonmandasyon vi volim lapel ki zot gannyen me i dir ki antretan son minister pe fer zot mye pour amelyor kontakt ant piblik ek bann zofisye sa minister.

Ti osi annan plizyer lezot kestyon asosye avek proze, kapasite sa minister pour zwenn lekspektasyon e demann sorti dan bann distrik, kapasite son resours imen, lapey pour son bann teknisyen, parmi lezot.

 

Marie-Anne Lepathy

More news