Follow us on:

Facebook Twitter LinkedIn YouTube

National Assembly

Lasanble i aprouv bidze SBC, Lazans Swen Lasante ek plizyer lezot antite |20 November 2019

En sonm 261,767 milyon roupi i bidze ki Lasanble in aprouve pour SBC pour lannen prosenn e sa ti vin apre bokou diskisyon ek kestyon par bann manm ki ti konmanse depi Lendi apremidi e ti kontinyen yer bomaten.

Sete sef egzekitiv SBC, Msye Berard Dupres, ek son lekip ki ti defann sa bidze.

Lasanble ti osi yer aprouv bidze plizyer lezot antite asosye avek lasante parey Lazans Swen Lasante, Lotorite Lasante Piblik, bidze pour sekretaryat Minister Lasante e plizyer lezot antite ki tonb anba sa minister parmi lezot ankor.

Konsernan bidze pour SBC bann manm ti kestyonn Msye Dupres ek son lekip lo plizyer size sirtou ki annan pour fer avek konstriksyon nouvo batiman SBC House Union Vale, rekritman, retansyon ek reminerasyon pour bann travayer SBC, difikilte asosye avek transmisyon SBC pour al lo DTT, konteni nouvel, kalite bann progranm, konteni e plis progranm lokal parmi lezot size ankor.

Manm LDS Flory Larue par egzanp ti anvi konnen si SBC i krwar ki dan sa moman kot i annan lezot konpetiter si format aktyel nouvel kot i annan zis anviron 3 minit pour tret en size aktyalite dan nouvel i ase e akoz napa ase analiz bann size aktyalite e plis konteni lokal.

Msye Dupres ti fer resorti ki SBC i toultan anvi amelyor kalite ek konteni nouvel pour piblik e i dir pour fer sa zot pe kontinyen rekrit dimoun konpetan me in admet ki i difisil pour ganny dimoun avek bann konpetans ek spesyalizasyon neseser pour fer sa bann prodiksyon nouvel. Me i dir SBC pe fer son mye avek News Extra kot i detay serten size.

Kot i konsern progranm lokal, Msye Dupres i dir sa i tre koute pour fer e malgre SBC in lans lapel pour dimoun andeor vin partisip dan sa bann tel prodiksyon sa i dousman e pe pran letan pour materyalize parey zot ti ava swete.

Konsernan bidze SBC limenm, Msye Dupre in eksplike ki ladan 161 milyon roupi pour SBC House, 8 milyon roupi pour proze pour bouz Radyo AM e se selman 1 milyon roupi ki pour progranm lokal, 1.2 milyon roupi pour progranm enternasyonal e sa ki reste i pour tou son bann lezot depans. Msye Dupres i dir SBC i esey fer sa ki i kapab avek bidze ki i annan.

Konsernan problenm avek transmisyon dan serten landrwa, Msye Dupres in dir ki dimoun i bezwen enform SBC pour ki bann teknisyen i ava kapab asiste zot.

Antretan bann bidze ki Lasanble in vot lo la san deba i enkli sa ki pour lofis Oditer Zeneral a en sonm 21.262 milyon roupi, Lofis Ombudsman en sonm 3.768 milyon roupi, lofis Public Service Appeal’s Board en sonm 1.230 milyon roupi ek lofis Constitutional Appointments Authority pour en sonm 2.064 milyon roupi.

Vot lo en sonm 8.881 milyon roupi pour lofis Komisyon Eleksyon in ganny anvoye pour plitar akoz le de dirizan dan lasanble in dakor ki vi ki in annan nouvo rekritman dan sa lofis resaman e vi ki lannen prosenn pou annan eleksyon, alor i enportan ki bann responsab sa lofis i vin eksplik zot depans anba sa bidze.

Kot i konsern bidze Lazans Swen Lasante, sete Minis Jean-Paul Adam limenm ek son lekip ki ti vin defann sa bidze ki en sonm 1,002,381 milyon roupi. I ti osi defann bidze pour Lotorite Lasante Piblik ki en sonm 59,078 milyon roupi, bidze pour sekretaryat Minister Lasante ki en sonm 48,012 milyon roupi.

Bann lezot antite ki tonb anba lasante me ki zot bidze in aprouve san okenn deba i enkli Seychelles Nurses and Midwives Council en sonm 1.743 milyon roupi e Konsey Nasyonal Pour Sida ki en sonm 5.295 milyon roupi.

Lasanble i kontiny son travay ozordi pour depouy bann diferan alokasyon bidze pour lezot antite.

 

Marie-Anne Lepathy

 

 

More news