Lekol segonder Beau Vallon i ranport konpetisyon konkour diskour kreol |31 October 2019

Lekip lekol segonder Beau Vallon, gran venker konkour diskour

Lekol segonder Beau Vallon i gran venker konpetisyon konkour diskour pour sa lannen par devan lekol segonder Belonie ki ti sorti dan dezyenm pozisyon, lekol segonder Mont Fleuri dan trwazyenm pozisyon e lekol segonder Pointe Larue ki ti fini dan katriyenm pozisyon.

Sa konpetisyon, ki ti fer yer bomaten dan Sant Konferans Enternasyonal, ti’n ganny organize par Lenstiti Kreol konman enn son bann aktivite pour koensid avek Festival Kreol.

Lobzektif sa konpetisyon se pour devlop langaz e fasilit lekspresyon, devlop teknik pour kominikasyon ek koze devan en lodyans e devlop konfyans ek personalite sa bann zenn etidyan.

Sa aktivite i ganny konsidere konman tre enportan lo kalandriye Lenstiti Kreol akoz i enn ki ede promouvwar e prezerv nou lalang maternel.

Ti Lotorite Laviasyon Sivil Sesel (SCAA) ki ti 'sponsor’ sa konpetisyon.

Lekol segonder Beau Vallon, ki ti konpri Kelly Bertin (tyermenn), Elodie Ah-Time (kozer) ek Abigail Joubert (lokiter), ti enpresyonn sa trwa manm lo panel ziri – Manmzel Joelle Perreau, Manmzel Annie Laurette ek Madanm Elva Gedeon – avek zot prezantasyon avek tit ‘Zwe tradisyonnel’.

Zot ti a pe pouse ki bann zwe tradisyonnel, ki’n preski disparet, i ganny re-entrodwir dan kominote e ganny enkorpore dan bann progranm skoler.

Sa trwa etidyan ti dir ki se teknolozi ek bann lezot aktivite sportif parey basketball ek volleyball parmi lezot ki’n ede pour fer ki bann zwe tradisyonnel tel ki balon prizonnyen, sot lakord, konos, toupi, kouk kasyet, plan kare, parmi lezot, in disparet konm aktivite lwazir dan nou lavi toulezour.

Zot ti dir ki bann zwe parey ti a ede pour fer bann zenn kominik byen avek kanmarad e osi ede pour konbat obesite parmi zenn akoz bann zenn ti pou nepli bezwen reste anndan oubyen asize dan en kwen zis lo telefonn ek enternet.

Zot ti osi dir ki sa kalite tradisyon fodre ganny siporte a tou pri.

Dan sa final, Elodie Ah-Time ti ganny vote konman meyer kozer e son koleg Abigail Joubert ti ganny vote konman meyer lokiter.

Abigail Faure sorti lekol segonder Mont Fleuri ti ganny vote konman meyer prezantater.

Tou le trwa ti dir ki zot ti ekspekte pour ganny sa konpetisyon akoz zot ti’n byen prepare pour li.

«Nou’n swazir sa topik zwe tradisyonnel akoz nou krwar i en keksoz ki pe perdi. Nou krwar si bann lotorite i met sa dan bann progranm lekol manrmay pou byen apresye. Sa pou vin en keksoz nouvo ki pou tir zot enpe dan sa lanvironnman zis devan en tablo oubyen pour anpes zot al fer bann lezot keksoz ki kont regleman lekol, » Elodie ti fer resorti.

Pour dezyenm plas, lekol segonder Belonie ki ti konpri Kylie Roberts (tyermenn), Naomie Laurence (kozer) ek Keith Soupramanien (lokiter), ti fer zot prezantasyon lo ‘Rol disik dan nou lavi’, vize sirtou lo son lenpak negativ ki i annan lo bann zenn tandis ki lekol segonder Mont Fleuri avek Abigail Faure (tyermenn), Rihana Pierre (kozer) ek Dwayne Antat (lokiter) ti donn en prezantasyon otour kestyon ‘Eski nou lalang kreol i an bonn sante’.

Lekol segonder Pointe Larue avek Ginnie Hoareau (tyermenn), Kelly Hoareau (kozer) ek Chloe Savy (lokiter), zot zot prezantasyon ti lo ‘Lenpak telefonn ek enternet lo bann zenn’ kot zot ti fer sorti ki apar bann zenn ki pe byen servi sa de modenm, i annan ki pe mal servi zot.

Apard sa kat lekol segonder ki ti dan final, lekol segonder Anse Royale ek lekol segonder Grand Anse Praslin, ki ti ganny eliminen dan staz eliminatwar, ti lesel de lezot lekol ki ti pran par dan sa konpetisyon.

Parmi lodyans pandan final sa konpetisyon ti sekreter prensipal pour kiltir, Cecile Kalebi ; sef egzekitif Lenstiti Kreol, Flora Ben David ; reprezantan SCAA, Darell Antat e reprezantan Minister Ledikasyon ek Devlopman Resours Imen, Thyra Faure parmi lezot.