Konpetisyon Kwiz Kreol |30 October 2019
Lekol Mont Fleuri segonder ti perdi dan final pour ranport dezyenm plas
Lekol segonder Grand Anse Praslin, distrik Les Mamelles gran venker
Lekol segonder Grand Anse Praslin ek distrik Les Mamelles i bann gran venker konpetisyon kwiz kreol enterskoler ek enterdistrik ki ti fer yer bomaten dan Sant Konferans Enternasyonal.
Sa konpetisyon kwiz ti’n ganny organize par Lenstiti Kreol an kolaborasyon avek Komite Festival Kreol dan kad aktivite edikasyonnel pour 34enm Festival Kreol.
Lekol segonder Grand Anse Praslin ti retenir zot tit ranporte lannen pase apre ki zot bat lekol segonder Mont Fleuri 26 lo 18 tandis ki distrik Les Mamelles ti reisi ganny sa tit – apre perdi kont distrik Anse Royale lannen pase – ler zot bat distrik Grand Anse Praslin 56 lo 22 pour sorti venker.
Final ti divize an trwa seri kot sa de premye ti lo baz endividyel e trwazyenm ti en seri par lekip. Sez kestyon ti ganny demande pour sak seri.
Dan premye seri lo lalang ek literatir kreol, Judith Germain, Ketsia Labrosse, Beloved Kowlessur ek Karym Port-Louis sorti dan lekol Grand Anse Praslin ti pran sa seri 7 pwen lo 5. Zot ti osi pran dezyenm seri kestyon lo zedmo, proverb, lekspresyon kreol, krwayans ek mers lontan lo skor 11 lo 5. Me keksoz ti egal 8 partou dan trwazyenm seri kestyon par lekip lo kiltir, listwar ek konnesans zeneral.
Pour ariv dan final, lekol segonder Grand Anse Praslin ti bat lekol segonder Plaisance tandis ki lekol segonder Mont Fleuri ti bat lekol segonder Anse Boileau dan semi final. Lekol segonder Anse Boileau ti bat lekol segonder Plaisance pour fini dan trwazyenm plas.
Lekol Grand Anse Praslin ti ganny anmennen dan sa final par Ketsia Labrosse ki ti resevwar pri pour skor plis pwen dan sa final. Dhuhaa Yusuf sorti lekol segonder Mont Fleuri ti resevwar pri pour skor plis pwen dan seri eliminatwar.
«Konpetisyon ti ase OK, me detrwa kestyon ti ase difisil e sa i akoz manrmay Praslin pa ganny sans pour vin kot Lenstiti Kreol pour fer resers e sa i en dezavantaz pour nou. Me nou vreman satisfe,» Ketsia ti dir.
Distrik Les Mamelles avek Claude Philoe, Genaitte Jean, Isabelle Joubert ek Meriliz Songoire ti antre dan sa final vreman for menm kot zot ti pran premye seri kestyon endividyel lo konnesans kiltirel 19 pwen lo 4 avan ki keksoz ti vin egal 12 partou dan dezyenm seri kestyon lo zedmo, proverb, lekspresyon kreol, krwayans ek mers lontan.
Anmennen par Msye Philoe, distrik Les Mamelles ti re-ouver lekar ankor par ranport trwazyenm seri kestyon baze lo kiltir, listwar ek konnesans zeneral 20 lo 6 pour fini venker 56 lo 22.
«Nou vreman satisfe. Nou’n fer en kantite resers e sanmen ou vwar rezilta in kounmsa. Lannen pase nou ti a’n kapab ranport sa tit me keksoz pa’n al byen. Me la sa skor i dir pour limenm,» Myse Philoe, ki ti resevwar pri pour skor plis pwen dan sa final, ti dir.
Pour ariv dan final, distrik Les Mamelles ti bat distrik Anse Royale ki ti bat li dan final lannen pase e distrik Grand Anse Praslin ti bat distrik Roche Caiman. Dan batay pour trwazyenm plas, distrik Roche Caiman ti bat distrik Anse Royale. Wiliana Dugasse ti ganny pri pour ranport plis pwen dan bann seri eliminatwar.
Apard bann kestyon direk, ti osi annan kestyon vizyel ek odyo. Se Lotorite Laviasyon Sivil Sesel (SCAA) ki ti’n 'sponsor’ sa konpetisyon.
Parmi lodyans kot sa konpetisyon kwiz kreol ti sekreter prensipal pour pti lanfans, primer ek segonder Odile de Comarmond, direkter zeneral pour pti lanfans ek ledikasyon primer Cyril Pillay, sef egzekitif Lenstiti Kreol Flora Ben David, e reprezantan SCAA Jean Hassan ek Lina Laurence parmi lezot.
En manm organizater sa konpetisyon, Madanm Erica Fanchette ki ti osi prezantater sa konpetisyon, ti dir ki zot satisfe avek partisipasyon par bann lekol segonder kot nef ti pran par me zot pa ti satisfe ditou avek partisipasyon lo nivo distrik kot selman sis dan 25 distrik ki ti pran par.
