Kominike Lapolis |20 March 2024

Michel Athanase i ganny sarze pour vol torti

Michel Athanase, aze 41-an sorti Cap Samy, Praslin, ki travay konman en zournalye, in formelman ganny sarze devan Lakour Mazistra Mahé dan en ka vol, ki ti ganny raporte avek lapolis le 15 Mars 2024 ver 3er 29 bomaten lo zil Curieuse.

Athanase ti ganny arete menm zour tar apremidi an posesyon 19 pti torti zean ki i ti’n vole dan en ‘nursery’ ki sitiye lo sa zil dan rezyon Baie Laraie.

Mazistra ki ti pe ekout sa ka in larg li lo en ‘bail bond’ 20 mil roupi, pour ki i raport kordgard de fwa par semenn pour siny liv lakour, pour pa ganny sarze avek okenn lofans parey pandan letan ki i deor, e pour pa enterfer avek okenn temwen dan sa ka.

Kominike sorti kot departman Lapolis