34enm Festival Kreol |29 October 2019
Benn Kanmouflaz pe performen andeor Mize Listwar
Lanbyans i sofe o-konmansman sa nouvo lasemenn travay
Touzour dan kad Festival Kreol, en seri animasyon ti deroule yer depi 11er bomaten ziska tar apremidi.
Mize Listwar Nasyonal an partikilye ti atir en gran nonm Seselwa ensi byen ki touris avek son bann aktivite.
Ler nou ti pas laba, ver midi edmi, benn Kanmouflaz ki ti andeor mize ti pe anim sa morso lavil avek diferan lanmizik Kreol Seselwa.
Plitar apremidi nou ti bat avek en lot benn ek bann dansez Tanmi ki pa ti ezite pour montre zot kapabilite.
Obor, bann travayer mize ti’n poz tou zot bann zartifay manze pour dimoun vin apresye e degiste.
Anvant ti kari koko zourit, kari koko bred pwason sale, salad dizef pwason, boulet pwason akonpannyen avek son lasos kreol e, pour deser, ladob patat ek bannann e salad mang.
Nichole Barreau, asistan konservatris Mize Listwar Nasyonal, ti esplik nou ki mize pou reste ouver ziska 7er diswar pour lokazyon Festival Kreol.
Seselwa i osi pe ganny akse gratwit dan mize ziska dernyen zour Festival Kreol dan plas pey 25 roupi.
De plis, mize ti yer akeir bann etidyan sorti dan trwa lekol ki ti vin vwar kiltir Kreol ‘letan lontan’ e partisip dan bann zwe tradisyonnel tel konman konos, plan kare e zwe lastik.
I bon pour note ki Mize Listwar Nasyonal pe organiz sa bann aktivite depi Vandredi e sa bann aktivite pou terminen demen.
En pe pli lwen, dan park waterfront kot La Passerelle, Joenise Juliette ek son latroup ti pe egey bann dimoun ki ti pe dezennen e menm sa ki ti pe pas otour sa landrwa.
Plitar, anviron 5er apremidi, en lot benn ti kontinyen avek sa lanbyans Kreol.
Bann portre ki akonpanny lartik i montre en pe lanbyans Kreol yer dan lavil Victoria.
