Lapel pour elimin diskriminasyon dan pei i kontinyen |02 March 2024
Msye Freminot
Lorganizasyon ‘HIV Aids Support Organisation’ (Haso) in organiz en foronm a lokazyon lazournen ‘Zero Diskriminasyon’ ki ti yer, Vandredi le 1er Mars, kot Mize Nasyonal Sesel.
Sa rankont sete pour sansibiliz dimoun lo sa size diskriminasyon dan Sesel.
Parmi dan lodyans ti tyermenn Haso, Justin Freminot, ki ti lans sa diskisyon en demi zournen.
«Mon byen kontan ki zot in kapab vini ozordi pour nou topik diskriminasyon, e deza sa i en keksoz ki nou pe war pe kontinyelman propaze.»
Msye Freminot ti osi demann partisipan pour sezi byen bann lenformasyon dan sa foronm pour ki zot a kapab vin bann endividi ki ede redwir diskriminasyon.
Dan en antretyen avek zournal Seychelles NATION, Msye Freminot ti eksplike ki tenm sa lannen i «Si ou anvi en dimoun i reste an bonn sante ou bezwen protez osi son drwa imen.»
I dir i swete ki sa foronm ava ede pouse ki i annan bann polisi ek lalwa ki kapab protez dimoun kont diskriminasyon dan pei.
Msye Freminot ti osi met lanfaz lo rezon ki zot in envit dimoun dan tou departman pour asire ki zot mesaz a kapab ganny pase partou dan lakominote.
Pandan sa rankont ti osi annan en prezantasyon lo diskriminasyon fanm dan Sesel par konsiltan endepandan, Benjamin Vel.
Msye Vel ti konmans par entrodwir definisyon diskriminasyon e osi donn bann statistik diskriminasyon dan Sesel avek bann solisyon pour bann tel aksyon.
Enn bann envite, Ernestine Biscornet, in dekrir sa rankont konman «enteresan ki’n donn lenformasyon esansyel».
Haso i osi ekspekte fer ankor en sesyon parey kot lakonpannyen Seypec Mardi le 5 Mars 2024 pour kontinyen sansibiliz popilasyon lo sa topik.
Kassey Govinden
Portre par Kurtrine Albert
