Lavant liv kreol pour selebre lazournen lalang maternel |24 February 2024
Sa lavant ki ti konmanse yer pou kontinyen ozordi (Portre : Louis Toussaint)
Seksyon literatir kot Lakademi Kreol Sesel in organiz en lavant bann liv kreol yer pour komemor Lazournen Lalang Maternel ki ti selebre le 21 Fevriye.
Sa bann liv in ekri par ekriven Seselwa e lavant in fer yer dan zarden Esa Camion Hall anvil e i pou kontinyen ozordi, Sanmdi, aparti 10er ziska 2er apremidi.
Seychelles NATION ti pas kot Camion Hall ver 10er bomaten yer pour al vwar ki manyer lavant pe ale e la nou ti koz avek en travayer Lakademi Kreol Sesel, Diana Simeon.
«Nou vwar ki depi ler nou’n met nou bann liv ekspoze lo latab nou’n ganny nou en bon pe dimoun ki’n vin aste,» i ti dir.
Madanm Simeon i dir in annan bokou lentere espesyalman parmi bann madanm.
«Se bokou plis nou bann diksyoner kreol e nou bann liv konstitisyon ki pe vann plis pour le moman,» i ti azoute.
Nou’n osi vwar bokou bann varyete liv pour zanfan ek adilt. Sa bann liv i enkli roman, poezi e zistwar kourt.
De madanm ki ti pe aste liv pour zot koleksyon e ki ti a prefere reste anonim ti partaz zot pwennvi lo sa linisyativ. «Fransman, mon kontan ki Lakademi Kreol Sesel in deside fer sa aktivite, vi ki bokou nou bann zenn zenerasyon pa pe tro konn bokou lo zot kiltir. Sa bann liv i ava tre itil pour zot,» sa premye madanm ti dir.
I azoute ki bokou nou pe perdi nou lidantite e liv parey konstitisyon e diksyoner i ava kapab relev nou kreolite.
Sa lot madanm lo son kote i dir konman en dimoun ki enpe pli aze i kontan vwar en tel aktivite.
«Nou diksyoner kreol i enn bann liv ki mon’n pli apresye ki mon pe vwar an vant. Mon menm parler mon vwar li difisil pour konn bann mo kreol e mon panse ki i en bon fason pour anpes nou perdi nou lalang marternel,» sa madanm ti dir.
Pri sa bann liv i varye e konmans aparti 25 roupi, bann liv Konstitisyon i kout 150 roupi e diksyoner pe vann 350 roupi en kopi.
Madanm Simeon i dir i kontan pour war ki bokou dimoun pe pase pour regarde e zot pe ankouraz plis dimoun pour fer sa zefor ozordi lo dezyenm e dernyen zour lavant e pour vin siport nou lalang maternel.
Kassey Govinden
