Sean Labiche i kondannen pour sove an detansyon lapolis |23 February 2024

Sean Labiche aze 19-an in kondann 6 mwan prizon pour lofans sove an detansyon lapolis.

 Sean Labiche ti komet sa lofans le 6 Avril 2021 dan kordgard Persévérance apre ki i ti sove dan prezans de zofisye lapolis madanm letan ki i ti’n ganny arete.

Dapre en rapor ki servis probasyonti prodwir devan lakour, sa kondannen ti’n ganny mete lo sipervisyon servis probasyon depi le 6 Zen 2019 ziska le 5 Zen 2021, kot i pa’n swiv ou respekte bann lord ki ti’n ganny enpoze lo li. 

Parmi rekonmandasyon servis probasyon ki’n fer avek lakour se ki Sean i fer en term prizon e osi en lord ki i kapab angaze dan progranm reabilitasyon kont drog pandan letan ki i pe deservi son santans prizon.

****

Keron Agathine i ganny sarze pour trespas kriminel

Keron Agathine aze 30-an sorti La Passe, La Digue in formelman ganny sarze devan Lakour Mazistra Praslin dan en ka trespas kriminel e vole ki’n resaman arive lo La Digue.

Mazistra in larg Agathine lo sa bann kondisyon swivan kot i pou bezwen pey en kosyon 8 mil roupi pour son laliberte provizwar, pour pa komet ou ganny sarze avek okenn lofans similer, pour pa enterfer avek temwen dan sa bann ka, pour prodwir de dimoun konman en garanti 10 mil roupi sakenn, e pour raport kordgard La Digue tou le Vandredi pour sinny liv lakour.

Keron Agathine pa’n reisi akord demann lakour pour pey sa kosyon 8 mil roupi ki fer i aprezan ganny rimann an detansyon servis prizon Sesel, e si i arive pey sa kosyon i pou ganny large e i pou bezwen swiv sa bann kondisyon ki’n enpoze

I pou repas devan lakour le 5 Mars 2024.

****

Patron Sri Lanken i kondann lanmann 550,000 roupi pour lapes ilegal

Makavita, Liyanage Dilesh, en Sri Lanken ki ti patron e zofisye ansarz abor en bato apele ‘Rankurulla 4’ in kondann en lanmann 550,000 roupi.

Sa kondannen ansanm avek lezot manm lekipaz ti ganny entersepte pe lapes dan lanmer Sesel le 24 Novanm 2023 apepre 185 mil notik Sid-Es Mahe e 40 mil notik avek zil Coetivty.

I annan 60 zour pour pey sa sonm, san kwa i pou fer en term 18 mwan prizon.

Ziz ki ti pe ekout sa ka in pran konsiderasyon avan pas santans lo Dilesh vi ki i ti’n pled koupab a son premye loportinite ki i ti’n gannyen, ki fer i pa’n gaspiy letan lakour.

I osi annan de zanfan ki ankor pe lekol, i en zonm marye e ki son fanmir i depan lo son reveni pour sirviv.

Sa kondannen ti’n refer sorti avek lakour ki sa bann pwason ki zot ti’n lapes ti’n ganny pran e vann pour en sonm 35,320 roupi ki Lotorite Lapes Sesel,  (SFA) ti’n kolekte.

Kominike sorti kot departman lapolis