Lansman kour Kreol pour komemor Lazournen Enternasyonal Lalang Maternel |22 February 2024
Lansman ofisyel kour kreol pour zofisye sorti dan bann minister ek lorganizasyon gouvernman ti enn parmi bann aktivitie pour komemor lazournen Enternasyonal Lalang Maternel ki ti selebre yer le 21 Fevriye.
Sete direkter egzekitif Lakademi Kreol Sesel, Madanm Flora Ben David ki ti ofisyelman lans sa kour pandan en seremoni kot Teat Nasyonal, Mont Fleuri.
Dan en antretyen avek zournal Seychelles NATION, Madanm Ben David i dir ki sa bann kour pou konmans an Mars e fer enn fwa per semenn pour en peryod 8 mwan.
Bann partisipan pou alafen ganny en sertifika. «Nou antisipe ki a la fen sa seri sesyon kreol bann partisipan ava kapab ankouraz lezot pour valoriz e donn koudmen prezerv nou lalang maternel,» Madanm Ben David ti dir.
Seremoni yer ti osi enkli distribisyon diksyoner kreol Seselwa e konstitisyon Larepiblik Sesel pour bann lekol primer, segonder leta e prive e bann lenstitisyon segonder. Sa ti ganny fer par zòn.
Distribisyon ti ganny fer par Madanm Erica Fanchette, direkter pour developman lalang, literatir ek tradiksyon; ek Madanm Jenny Saminadin, asistan serser pour literatir.
Direktris lekol Plaisance segonder, Jenny Kilindo, ti dir ki sa bann diksyoner kreol pou pli byen benefisye zot bann ansenyan menm si lamazorite zot bann size i an Angle.
«I annan size ki nou anmenn kreol ladan pour zis ranforsi bann konsep ki manrmay i aprann, parey lo kote PSE ek larelizyon,» Madanm Kilindo ti dir.
I ti azoute ki sa osi pou ede dan bann diferan aktivite kreol ki zot fer an deor lekol.
«Bann manrmay pou kapab eksplor bann vokabiler ki zot annan.»
Pour kontiyen demonstre kiltir ek lalang kreol yer, lekol primer Plaisance ti perform en sanson ek ladans, ensi ki fer rakontaz en zistwar kourt, e Richam Magnan ti prezant en pyes.
Komemorasyon Lalang Maternel i fer tou le-z-an le 21 Fevriye e Sesel i fer li son devwar pour met lanfaz lo sa lazournen.
Letan i ti pe adres bann envite kot louvertir, Madanm Ben David ti dir ki sa tenm ki’n swazir sa lannen ‘Multilingual education is a pillar of intergenerational learning’, i envit nou tou – zanfan, zenn, adilt, trwazyenm az – pour zwenn ansanm pour partaz konesans e leksperyans pour promouvwar miltilengwizm dan laprantisaz tou dilon nou lavi.
«Lakademi i ankor enn fwa afirm son laganzman pour promouvwar, prezerv lalang kreol e kiltir Seselwa a tou nivo ledikasyon,» Madanm Ben David ti dir.
Parmi bann prezan kot sa aktivite yer ti sekreter zeneral Lenstiti Nasyonal pour Kiltir, Leritaz ek Lar Sesel, Msye David Andre, sekreter permanan Madanm Cecile Kalebi, ensi ki reprezantan Konsey Nasyonal pour Lar e Lartizana, Minister Ledikasyon, manm komite nasyonal lalang kreol, etidyan ek ansenyan dan diferan lekol.
Antretan komemorasyon sa zour i kontinyen Vandredi avek lavant liv kreol par Lakademi Kreol Sesel depi 10er bomaten ziska 2er apremidi dan zarden kot Esa.
Anika Cathene
