Lenstiti Kreol i rekonpans bann venker pri literer Regina Melanie |26 October 2019
Bann gannyan dan en portre souvenir avek envite
Bann zelev primer ki’n partisip dan 3enm Konkour Literer Regina Melanie e ki ti sorti premye, dezyenm e trwazyenm respektivman ti ganny zot pri pandan en seremoni Zedi kot ICCS.
Sa konkour i annan pour bi ankouraz bann zelev pour form parti sa nouvo zenerasyon ekriven dan Sesel.
Pri Literer Regina Melanie i en linisyativ Lenstiti Kreol ki ti lanse le 21 Fevriye 2017 pour onor Madanm Regina Melanie ki ti kit deryer en leritaz lengwistik enkrwayab apre son lanmor an 2016.
Madanm Regina Melanie ti konmans aprann lir ek ekrir a laz adilt, e avek gran determinasyon i ti ranmas otan konnesans pour li konmans ekrir bann poem e zistwar.
Konkour Regina Melanie i konpri kategori poezi pour zelev P1-P3 e P4-P6 ensi ki en kategori zistwar kourt pour P1-P3 e P4-P6.
Premye pri pour poezi P1-P3 ti al pour Kimora Andriamihariso sorti lekol La Misère, dezyenm ti al pour Jesse Meme sorti lekol Au Cap e Aiden Laporte sorti Mont Fleuri primer ti ganny trwazyenm pri.
Lo kote P4-P6 pour menm kategori, Anand Narayan lekol Mont Fleuri ti sorti konman gran venker swivi par Dwayne Gerry lekol Mont Fleuri e Christina Belle sorti Au Cap.
Pour zistwar kourt P1-P3, premye pri ti al pour Dala Mathiot lekol Mont Fleuri, dezyenm pri pour Ezekiel Pierre lekol Mont Fleuri e Shanno Jeanne sorti lekol Port Glaud ti tonm trwazyenm.
Premye pri pour kategori zistwar kourt P4-P6 ti al pour Andre Matombe lekol Grand Anse Mahé, dezyenm ti al pour Aiden Lalande lekol Beau Vallon e trwazyenm ti Kaysie Traore lekol Perseverance.
Meyer lekol pour tou le de kategori, poezi ek zistwar kourt, ti al pour Mont Fleuri.
Gannyan kategori P4-P6 pour poezi, Anand Narayan ki dan P5(1), ti esplike ki i ti ganny enspire pour ekrir en poenm lo son fanmiy.
«Mon zwaye akoz mon pa ti ekspekte ki mon ti pou ganny en pri dan kreol,» Anand ti azoute.
Byen timid, Ezekiel Pierre dan P2(2) Mont Fleuri ti dir : «Mon apresye ki mon’n ganny sa pri. Mon paran in ed mwan bokou, mon bann teachers osi ti tyek mon travay e mon vreman kontan.»
Lo son par, Aiden Lalande ki ti sorti trwazyenm pour zistwar kourt ti dir ki sa pri i donn li konfidans pour kontinyen ekrir.
Dan son diskour byenveni, sef egzekitif Lenstiti Kreol, Madanm Flora Ben David, ti fer resorti ki sa lannen zot in ganny plis partisipasyon bann lekol e ki sa i byen ankourazan.
«Premye edisyon sa konkour ti annan partisipasyon 4 lekol primer e son 3enm edisyon nou vwar 11 lekol. En siny ki sa konkour pe fer son lenpak pozitiv.»
«Prezantasyon 3enm edisyon Pri Regina Melanie i mark langazman Lenstiti Kreol Sesel pour ankadre bann zanfan lekol pour vin ansanm avek bann adilt avek en lentere komen ; ede prezerv, devlop e promouvwar nou lidantite kiltirel, istorik e lengwistik.»
Madanm Ben David ti anplis ankouraz bann zanfan pour kontinyen ekrir pour «kapab vin bann fitir gannyan Pri Antoine Abel».