En zonm i mor, en lot i ganny arete |13 February 2024
Channel Alcindor, sorti dan distrik Anse Royale e ki aze dan son karantenn lannen, in perdi son lavi, yer, swivan en lensidan kot Beach Park, Anse Royale.
Lapolis in aret en zonm aze 23-an sorti Mont Plasir, distrik Anse Royale, konman sispe.
Lapolis ti ganny alerte lo sa lensidan ver 5er25 yer apremidi.
En lanket in konmanse dan sa ka antretan ki zot esper rapor letopsi pour determin lakoz e sirkonstans otour lanmor Channel Alcindor.
****
Lekor en zonm i ganny vwar pe dekonpoze dan son lakaz
Lekor en zonm aze 60-an sorti dan Gravye, Anse Aux Pins, in ganny dekouver pe konmans dekonpoze dan son lakaz.
Sa zonm in ganny idantifye konman Louis, Gonzalse Belize.
Dapre rapor inisyal ki lapolis in ranmase, dernyen fwa ki Msye Belize ti ganny vwar vivan ti Sanmdi le 10 Fevriye 2024 ant 10er a 10er30.
Sete yer apremidi ki de son zanmi ti fer sa dekouvert, letan zot ti’n al get li kot son lakour.
Lapolis ti ganny alerte ver 1er55 apremidi e en lanket in konmanse antretan ki zot esper rapor letopsi pour determin lakoz e sirkonstans otour son lanmor.
Kominike sorti kot departman lapolis