Lapolis i komans demars pour idantifye lekor en zonm |09 February 2024
Lapolis in konfirmen ki sa lekor ki ti ganny ranmase dan lanmer dan rezyon Carana, Glacis, tar apremidi le 4 Fevriye 2024, i lekor en zonm.
Lapolis pe fer provizyon pour fer bann tes siyantifik pour kapab determin lidantite sa zonm.
****
En garson miner i ganny sarze pour kat lofans
Johan Charlette aze 14-an sorti Grand Anse Mahe in formelman ganny sarze devan lakour pour bann miner dan kat ka.
Sa i pour vole, vol dan en transpor, andomaz propriyete, e sove an detansyon lapolis.
Lapolis atraver prosekisyon ti osi anmenn en mosyon devan lakour pour enform Mazistra ki sa akize ti’n kas lord e kondisyon ki lakour ti’n enpoz lo li oparavan.
Mazistra ki ti pe ekout sa ka in ‘revoke’ kondisyon kosyon sa akize e rimann li an detansyon lapolis pour 14 zour.
****
En zonm i ganny arete pour vol lo lans Ros Kopra
En zonm aze 42-an sorti Anse Gaulette, Baie Lazare in ganny arete zis apre ki i ti’n fek fini vole lo lans Ros Kopra, Anse Gaulette, yer bomaten.
Lapolis in rekiper propriyete ki ti’n ganny raporte vole dan sa ka.
Sa sispe, ki pa dan lanplwa, pe ganny detenir e i ekspekte pas an kour ozordi bomaten.
Lapolis ti ganny alerte lo sa ka ver 11er55 bomaten e en lanket i an progre dan sa ka.
****
Ryan Gappy i ganny sarze pour trwa lofans
Ryan Gappy aze 23-an sorti Union Vale in formelman ganny sarze devan lakour Mazistra dan trwa ka.
Sa i pour an posesyon en zouti ofansiv dan en landrwa piblik, tretman menas vyolans, e andomaz propriyete.
Mazistra in larg Gappy lo plizyer kondisyon ki enkli en ‘bail bond’ 5 mil roupi, pour pa enterfer avek temwen dan sa ka, e pour prezan devan lakour a sak fwa son ka pe ganny ekoute.
****
Ned Radegonde i ganny sarze pour vol
Ned Radegonde aze 25-an sorti Pointe Larue ki ti pe reste La Digue, in formelman ganny sarze devan Lakour Mazistra dan en ka vol lo lans ki ti arive lo La Digue le 6 Fevriye 2024 Anse Source D ’Argent.
Mazistra in larg Radegonde lo plizyer kondisyon ki enkli pour pey en kosyon 8 mil roupi pour son laliberte provizwar, prodwir de dimoun koman en garanti 10 mil roupi sakenn pour asir son prezans devan lakour, e pour raport kot kordgard La Digue 1 fwa par semenn pour vin sinny liv lakour.
Radegonde pa’n reisi akord demann lakour ki fer i aprezan ganny rimann Prizon Montagne Posée ziska le 22 Fevriye 2024 zour ki i ekspekte repas devan lakour.
Ned Radegonde ti ganny arete abor en bato apre ki i tin fek ariv dan Por Mahe, e swivan lafouy fer lo li lapolis ti dekouver en telefonn ki ti parmi bann propriyete ki ti’n ganny raporte vole dan sa ka.
****
En zonm i ganny arete pour vol
En zonm aze 47-an sorti Takamaka, ki pa dan lanplwa, in yer bomaten ganny arete zis apre ki i ti’n fek fini vole lo en lans Takamaka.
Lapolis in rekiper propriyete ki ti’n ganny raporte vole dan sa ka. Sa sispe pe ganny detenir e i ekspekte pas an kour ozordi bomaten.
Lapolis ti ganny alerte lo sa ka ver 9er25 bomaten e en lanket i an progre dan sa ka.
Kominike sorti kot departman lapolis