Kominike Lapolis |27 January 2024
En zonm i ganny sarze pour plizyer lofans
Scott Morin, aze 33-an ki pa dan lanplwa e sorti Au Cap, in formelman ganny sarze devan Lakour Mazistra Anse Royale yer dan plizyer ka.
Sa i pour an posesyon en zouti ofansiv dan en landrwa piblik, andomaz propriyete, konportman dezordonnen dan en batiman lapolis, lagresyon fizik lo en zofisye lapolis, andomaz propriyete gouvernman, labi seksyel e vole.
Morin ti’n deza komet serten sa bann lofans pli boner sa mwan e atraver lanket lapolis in kapab anmenn li lo sa bann sarz.
Sa akize, ki ti pe ganny detenir dan kordgard Anse Aux Pins, ti yer granmaten osi fer dezord dan son kaso e andomaz propriyete leta.
Sa akize in aprezan ganny rimann prizon Montagne Posée ziska le 7 Fevriye 2024 zour ki i ekspekte repas ankour.
Departman Lapolis i fortman kondann bann aksyon parey dan nenport son bann stasyon, e ki tou aksyon neseser pou ganny pran kont nenport ki ki responsab pour ki zot ganny prosekite devan lakour pour lofans ki zot komet.