Kominike Lapolis |25 January 2024

De fanmiy i antre an konfrontasyon

Trwa (3) zonm aze 23-an, 26-an ek 21-an e ki sorti Union Vale, i a detansyon lapolis pour 13 zour swivan en lensidan ki’n arive Mardi swar Union Vale e dan Lopital Sesel.

Tandis ki 3 lezot sispe dan sa menm lensidan in ganny large lo kondisyon Lakour Mazistra.

Lapolis ti ganny alerte lo en lensidan Mardi tar apremidi apre ki en group fanmiy ti’n antre an konfrontasyon avek en lot group fanmiy ki trouv zot vwazen dan en flat Union Vale.

An rezilta sa bagar, en zonm ti sibir serten blesir grav e bezwen raport Lopital Sesel pour swen medikal irzan.

E se la kot sa lot group fanmiy ti osi vin dan Lopital Sesel e enn parmi sa sispe aze 23-an, arme avek en gran kouto ti fizikman agres en dokter e andomaz propriyete dan sa lopital.

Erezman a sa moman en zofisye lapolis ki pa ti pe travay ti prezan kot lopital e i ti dezarm sa sispe avan rod lasistans.

En madanm 48-an, en zonm 51-an ek en garson 16-an sorti Union Vale in ganny large lo kondisyon pour siny liv lakour 2 fwa par semenn kot stasyon lapolis Perseverance.

Zot osi napa drwa enterfer avek temwen ek konplenan dan sa ka, e raport ankour le 6 Fevriye 2024.

Si zot pa vini pou annan en ‘warrant’ pour zot larestasyon.