Lucide ek Julien Morel i selebre zot Nosdor |08 January 2024
Msye ek Madanm Morel i renouvle zot ve
Par Anika Cathene
Msye Julien Morel aze 73-an ek Madanm Lucide Morel (ne Emmanuel) aze 69-an, i en lot koup ki’n reisi selebre zot 50-an lanniverser maryaz Sanmdi le 6 Zanvye 2024.
Zot ti selebre sa lanniverser enportan dan zot relasyon kot restoran Maison Marengo, dan konpanni zot bann fanmiy pros ek zanmi.
Seremoni ti konmans avek benefiksyon par kire laparwas legliz St Pierre e St Paul, Port Glaud, Per Thierry.
Zot ti renouvle zot ve ki zot ti fer 50-an pase le 6 Zanvye 1974 avek Per Theophane dan legliz sa menm distrik. Sa letan Madanm Morel ti aze 19-an e Msye Morel 23-an.
Dapre Msye Morel tou ti konmans ler i ti apersevwar Madanm Morel dan en bal dan sant sosyal Port Glaud kot Madanm Morel ti akonpannyen par son manman. Msye Morel i azoute “mwan ki ti fer premye pa”. Dan sa letan Madanm Morel ti en ansennyan e reste avek son paran Port Glaud.
Msye Morel ti en zabitan Port Launay e ti travay avek en lakonpannyen. Sa koup pa ti marye deswit me apre 3-an ki zot ti zwenn.
“Avek lagras Bondye premyerman, osi respe, pasyans, e bon konprenezon ki nou’n reisi ariv 50-an,” Madanm Morel ti azoute.
Sa koup i annan 5 zanfan ki enkli de fiy ek trwa garson, ensi ki senk pti zanfan ki bann fiy, ek en aryer pti zanfan ki osi en fiy.
Msye ek Madanm Morel i swete ki tou zot zanfan i swiv dan zot lepa vi ki enn zot garson in fini marye. Zot dernyen zanfan, Dorica aze 36-an, ti azoute ki i vreman kontan pour war son paran ankor ansanm akoz pa tou ki arive selebre zot Nosdor. I osi remersye son paran pour touzour dan zot kote e pour fer zot grandi.
Msye ek Madanm Morel i ankouraz bann zenn pour marye, me ler zot santi ki zot vreman pare osi fer sir ki zot konn byen sa dimoun ki zot in angaze avek.
Madanm Morel i termin par dir ki “lavi maryaz i en lotri; i annan perdi ek gannyen”. E pour li son maryaz ti en ‘jackpot’ ki i’n gannyen.
Dapre lafanmiy, selebrasyon pa’n lo sa lanpler ki zot ti ava anvi akoz kondisyon lasante Msye Morel.
Nou seleksyon portre i montre enn de moman for sa selebrasyon.
Portre: Kontribye
