Kominike Lapolis |05 January 2024
En zonm i admit dan ICU avek blesir grav
En zonm 37-an sorti dan distrik Les Mamelles i admit dan younit swen entansif (ICU) Lopital Sesel avek dimal grav lo plizyer parti son lekor e son kondisyon in ganny dekrir konman kritik.
Sa i an relasyon avek en lensidan dan en ‘car park’ anvil, ki ti raporte avek lapolis le 2 Zanvye 2024 ver 3er bomaten.
En zonm 41-an sorti Mont Fleuri in ganny arete an relasyon avek sa ka e in pas devan Lakour Mazistra Merkredi le 3 Zanvye 2024, kot in ganny rimann pour 14 zour.
Lapolis in konmans en lanket dan sa lensidan.