Kominike Lapolis |04 January 2024
En zonm i mor dan aksidan larout
Lapolis in yer rikord premye aksidan fatal pour 2024. Viktim ti en zonm aze 74-an sorti Rochon.
Sa aksidan ti ariv yer bomaten English River kot sa zonm ti ganny tape avek en moter letan ki i ti pe travers semen.
En garson 21-an sorti distrik Takamaka ki ti lo sa moter in sibir dimal ase serye kot in admit Lopital Sesel. Lapolis in konmans en lanket dan sa ka.
********
Lekor en zonm ki ti’n perdi dan lanmer i ganny retrouve
Lekor sa zonm 27-an avek nasyonalite Nizeryen ki ti raporte manke Dimans apremidi dan lanmer Beau Vallon in ganny retrouve dan lanmer Mare Anglaise yer apremidi.
Sete en zonm ki ti fer sa dekouvert e answit alert lotorite. Sa zonm Nizeryen ti pe travay kot en garaz Plaisance.
Lapolis in konmans en lanket dan sa ka, annatandan rapor letopsi pour determin lakoz ek sirkonstans son lanmor.