Gouvernman Lokal ek Zafer Kominoter |06 December 2023

Bann volonter dan en portre souvenir avek envite

Minister i remersye son bann volonter

Minister Gouvernman Lokal ek Zafer Kominoter in dir mersi son bann volonter ki form parti lekip brigad dan distrik, e rekonnet zot travay.

Sa ti pandan en seremoni ki’n fer yer bomaten kot lotel Berjaya Beau Vallon Bay.

Sa levennman ti’n organize pour koensid avek Lazournen Volonter ki le 5 Desanm.

Sa seremoni ti fer dan prezans Minis Rose-Marie Hoareau, sekreter prensipal pour Zafer Sosyal, Linda William-Melanie, ensi ki reprezantan Lakrwa Rouz Sesel ek Divizyon Zesyon Risk ek Dezas, parmi lezot.

Manm brigad sorti dan tou le 26 distrik ti prezan, e zot ti ganny prezante avek en sertifika konman en senbol ki sa minister i vwar e apresye zot kontribisyon.

Ler i ti adres zot, Minis Hoareau ti eksprim son profon rekonnesans anver kontribisyon remarkab ki zot pe anmennen konman bann manm brigad pour ed zot kominote pandan dezas.

“Zot dedye zot letan ek zot lenerzi pour ed bann endividi ki dan gran bezwen dan lakominote. Zot touzour pare pour donn en koudmen anver aktivite distrik e byensir zot touzour reponn lapel ladministrasyon distrik ler i annan en irzans ouswa dezas. Mon anvi zot konnen ki zot zefor in tous bokou e ki nou vreman apresye zot lespri volontarya,” Minis Hoareau ti dir.

Tenm pour Lazournen Volonter sa lannen i ‘The power of collective action: if everyone did’; en tenm ki Minis Hoareau i dir i reflekte lo “nou kapab realize si nou travay ansanm” e ki sa se vre lespri brigad dan distrik.

Mo remersiman ti osi sorti kot sekreter prensipal pour Gouvernman Lokal ek Zafer Kominoter, Kevin Perine, ki dir ki bann manm brigad i legzanp pour lezot akoz zot bann “temwannyaz vivan ki aksyon i touzour pli for ki parol”.

I kontinyen pour dir ki kontribisyon sa bann manm i al pli lwen ki dan zis bann moman dezas. “Menm ki nou bann manm brigad i souvan adres bann levennman parey lapli toransyel, deboulir later, linondasyon, pye dibwa tonbe, dife brousay ouswa dife lakaz, e plis ankor, i enportan pour soulinyen ki zot kontribisyon i al pli lwen ki zis fer fas avek bann irzans. Nou salye bann manm brigad akoz zot osi partisip aktivman dan lavi kominoter.”

I osi azoute ki an 2024 minister pe antisip ranforsi son langazman anver brigad dirzans e sa se pour ogmant konpetans bann volonter atraver bann diferan formasyon ek sesyon ki pou ganny ofer.  

Enn bann manm brigad, Priscilla Bristol, ti osi partaz enpe son leksperyans atraver en pti temwannyaz. Manmzel Bristol ti zwenn brigad distrik Pointe Larue 14-an pase. I dir sa i en parkour ki’n anmenn li bokou lafyerte ek lazwa akoz depi lanfans in toultan pare pour ed lezot e donn en koudmen bann ki bezwen.

Me i osi azoute sa pa vedir ki i pa’n rankontre difikilte. “Sa lespri volontarya in touzour dan mwan, me byensir i pa’n touzour fasil konman en madanm tousel avek trwa zanfan, mon’n war mwan fer fas avek bokou defi, e enn bann pli gro defi se ler mon de zanfan ti fer aksidan. Me sa pa’n anpes mwan. Mon’n touzour debout for e ozordi mon ankor pe debout fyer konman en manm brigad.”  

Manmzel Bristol i osi azoute ki malerezman parfwa, kantmenm manm brigad pe ofer zot servis zot vwar zot pe fer fas avek bokou labi verbal sorti kot bann endividi dan lakominote. I swete ki manm piblik i ava montre enpe plis respe anver zot e osi montre plis korperasyon ki ava ede fer keksoz mars pli fasilman.

Sa seremoni ti osi vwar performans par bann artis e osi reprezantan departman gouvernman lokal.

Diane Larame

Portre par Louis Toussaint