‘Zezi Vre Zonm’ i selebre 10-an legzistans |04 December 2023
En portre souvenir avek Kire laparwas pandan lanmes yer
Yer, Dimans le 3 Desanm, ti fer egzakteman 10-an depi ki groupman zonm apele ‘Zezi vre Zonm Seychelles’ ti vin an egzistans.
Pour komemor laniverser zot legzistans Sesel, en lanmes ti selebre dan legliz St Therese Plaisance, sa menm legliz kot tou ti konmanse dapre manm Charles Zialor.
“Bi sa mouvman se pour anmenn tou zonm ansanm pour fer en diferans dan zot fanmiy, dan kominote, e pei an zeneral. Bann formasyon in reisi fer bokou pour zonm, kot zot in kapab reflesir bokou lo zot lavi,” Msye Zialor i dir.
“I vre in annan ki’n tonbe me zot in annan en zepol pour apiy lo la e sa se zezi li menm,” i azoute.
‘Zezi Vre Zonm Seychelles’ i dir ki sa lokazyon i osi en letan pour selebre lakonplisman me osi met latansyon lo bann defi lavi ki paraliz sosyete.
Fodre note ki yer sa lanmes legliz St Therese ti animen antyerman par sa group zonm.
‘Zezi vre Zonm Seychelles’ i annan plis ki 300 manm dan sosyete.
En kontribisyon