55.2 milyon roupi pour proze kominoter an 2024 |17 November 2023
(Gos a drwat) Marlene Valentin, Kevin Perine, Romano Songor ek Daniel Adeline pandan rankont avek lapres yer
Par Patrick Joubert
Dan alokasyon bidzeter Minister Gouvernman Lokal ek Zafer Kominoter pour 2024 – ki en sonm R151.5 milyon – 55.2 milyon roupi ladan pou al direkteman pour bann proze kominoter.
Bann zofisye sa minister ti zwenn avek medya kot zot biro dan batiman Ocean Gate House yer apre-midi pour donn detay lo sa bann proze.
Ler i ti pran laparol, sekreter prensipal pour Gouvernman Lokal ek Zafer Kominoter, Kevin Perine, ti dir ki pour 2024, priyorite son minister se pour kontinyen batir lo son bann sikse 2022-2023 tel konman amelyorasyon lo son bann lenfrastriktir dan distrik, devlopman proze kominoter e promosyon bann progranm pour benefis lakominote.
I ti dir o nivo lenfrastriktir, R26 milyon in ganny bidzete kot sak distrik pou ganny R1 milyon, konpare avek R740,000 an 2023, pour zot bann pti proze kominoter. I dir ki adisyonnelman nouvo dan zot bidze i en sonm R10 milyon ki pou ede adres bann proze semen dan bann distrik lo Mahé, Praslin ek La Digue.
Dan kad bann proze konstriksyon e renovasyon, Msye Perine ti dir ki R5 milyon pe dedye pour konstrir en nouvo ladministrasyon distrik e sant kominoter pour distrik Cascade. Toulede pou ganny fer lo menm teren ki anfas avek bazar. Fodre fer remarke ki sant kominoter sa distrik ti brile diz-an pase e sekreter prensipal Perine i dir ki sa i en proze ki esansyel pour bann zabitan Cascade pour zot ganny en landrwa pour fer zot aktivite e akse bann servis. En sonm R4 milyon in osi ganny mete pour en nouvo ladministrasyon distrik Bel Ombre ki pou ganny konstrir enpe pli pros ek sant kominoter.
Msye Perine in osi dir ki bann zabitan Ile Perseverance pou finalman ganny zot batiman ladministrasyon distrik ensi byen ki zot sant kominoter la ki en sonm R4 milyon in ganny bidzete pour fer sa konstriksyon. Sa de lenfrastriktir ki pou servi zabitan Ile Perseverance 1 ek Ile Perseverance 2 pou ganny batir lo en morso teren dan zanmerant legliz katolik, St Esprit. I dir letan sa de vilaz ti pe ganny konsevwar, ti napa provizyon pour en ladministrasyon distrik ek en sant kominoter.
I’n fer remarke ki son minister in vwar li en priyorite, parey pour bann zabitan Cascade, pour donn sa bann zabitan Ile Perseverance en letan pour akse bann servis ki zot ofer lo nivo kominote pli konfortableman. Aler aktyel se de lakaz dan Ile Perseverance 1 ek 2 ki pe ganny servi konman ladministrasyon distrik.
Lo kote bann proze renovasyon, PS Perine in dir ki en sonm R1.5 milyon ek en lot R700,000 in ganny bidzete pour fer renovasyon lo sant kominoter Mont Buxton ek Beau Vallon respektivman.
En lot konstriksyon i en nouvo fasilite ‘day care’ dan distrik Les Mamelles. Sa ‘day care’ ki pou pran anviron 60 zanfan, pou ganny konstrir ant biro ladministrasyon sa distrik e klinik Les Mamelles. En sonm R2 milyon pe ganny mete pour sa proze, ensi byen ki R2.5 milyon pour renovasyon lo sa 15 lezot fasilite ‘day care’ ki deza annan dan pei.
An sa ki konsern sipor pour minister kapab reakte lo bann ka dirzans ouswa dezas dan bann distrik, Msye Perine in dir ki minister pe ganny en alokasyon R2.5 milyon pour asiste zabitan dan bann evantyalite dezas tel ki gro lapli, pye dibwa ki tonbe, deboulir later ek ros, miray grennen, e delo ki rantre dan lakaz dimoun parmi lezot.
Sekreter Prensipal Perine i dir ki gouvernman lokal i reste angaze pour kree, promouvwar e fasilit bann progranm e aktivite dan tou distrik pour benefisye tou kous lasosyete. I ti osi lans en lapel avek bann endividi ek lorganizasyon pour angaz zot dan lavi kominoter e devlop bann progranm pour byennet zot kominote.
Anvi sa kantite lenvestisman ki pe ganny mete dan bann fasilite kominoter, i ti osi demande ki piblik i servi sa bann fasilite byen, o-maksimonm e dan en fason responsab ki zot a reste dirab pour en kantite letan.
Osi prezan kot sa rankont avek medya ti Daniel Adeline, direkter zeneral pour distrik ek fasilite kominoter dan Lazans Lenfrastriktir Sesel (SIA), Romano Songor, direkter zeneral pour servis sipor ek Marlene Valentin, kontroler finans, sorti kot minister.