Zenn Artis Kreolofonn i ganny rekonpanse |28 October 2023
Festival Kreol in ankor enn fwa rekonnet zenn talan dan son konpetisyon Zenn Artis Kreolofonn ki’n fer dan lasemenn kot Carrefour des Arts, anvil.
Sa aktivite anyel ki target zenn depi 4-an a 21-an, i en platform kot zot kapab demontre zot konnesans artistik dan diferan form lar.
Sa lannen in annan kat kategori, e le trwa meyer dan sak in ganny rekonpanse. Dan sa konpetisyon organize par Komite Festival Kreol ek Konsey Nasyonal pour Lar ek Lartizana bann zenn artis in demontre zot talan pa zis dan lar vizyel me osi dan lanmod ek artizana an servan bann lobze resikle dan lanvironnman.
Dan kategori 4 a 8-an, premye pozisyon ti al pour Dianna Nicette sorti lekol La Misère, swivi par Kellysha Marie, Beau Vallon primer dan dezyenm pozisyon tandiski Neron Julius osi Beau Vallon primer, ti sorti trwazyenm. Zot ti resevwar zot pri avek kordinatris Zenn artis lemonn Kreolofonn, Vivienne Croisée.
Pour kategori 8 a 13-an se Erin Marengo, sorti lekol Bel Eau, ki ti gran gannyan swivi par Hurah Confiance, lekol Beau Vallon primer e Mickaella Morel, Bel Eau dan dezyenm e trwazyenm plas respektivman. Se Sekreter Zeneral Lenstiti Nasyonal Kiltir, Leritaz ek Lar, David Andre, ki ti prezant pri avek sa trwa zenn artis.
Sekreter prensipal pour kiltir, Cecile Kalebi, ti prezant pri avek bann ki’n fer pli byen dan kategori 14 a 17-an e sa ti al pour Jessica Marie dan premye plas, Aulairy Morel dan dezyenm pozisyon e Emily Morel, trwazyenm.
Dernyen kategori 18 a 21-an ti annan selman premye e dezyenm plas e sa ti al pour Sheryl Confiance konman gran gannyan, e Sherin Prea dan dezyenm plas. Zot ti resevwar zot pri avek Jimmy Savy, sef egzekitiv Konsey Nasyonal pour Lar ek Lartizana.
Pandan sa seremoni, en group zanfan ki’n partisip dan en latelye dan artisanal ek lar vizyel apre ler lekol fasilite par Donation Freminot, e ki ti’n organize par Konsey Nasyonal pour Lar ek Lartizana, ti osi resevwar zot sertifika.
Apre sa bann envite ti ganny sans apresye travay sa bann artis dan en legzibisyon kot Carrefour des Arts, anvil.
Patsy Canaya
