Festival Kreol 2023 |28 October 2023
Bann group ladans i egey lafoul dan Selebo
Festival Kreol pa konplet san son bann aktivite popiler ki atir gran nonm piblik. Bann aktivite tel ki Tifin, Moman Kreativite, Bal Bobes e menm Selebo i parmi bann ki fer li sa vre Festival Kreol.
Lanmizik kreol ti rezonnen atraver Victoria yer swar pandan gran aktivite fidel lo kalandriye sa festival – Selebo. Sa levennman ti ganny fer dan carpark Stad Popiler anvil. En varyete ladans ti gard lafoul tre egeye e byensir zot osi zot ti pe bouz leren.
Sa aktivite organize par group Tanmi ti konmans midi kot ti annan en DJ ki ti pe konmans met lanbyans avek bann sanson kreol modern osi byen ki bann sante par bann vedet dan lanmizik kreol Seselwa. Ti osi annan bann stalls ki ti pe vann manze kreol.
Lanmizik ti apre sa bese pour pa deranz bann lofis me ti repran apre 4er apremidi kot ankor DJ ti animen.
Apre ki DJ ti’n met lafoul dan sa bon lanbyans kreol, bann performans ladans ti konmanse. Premye performans ti par en group ladans Malgas ki reste isi menm. Zot ti fer lafoul vibre avek bann performans tre ritme.
Ti osi annan partisipasyon en latroup Endyen, bann zenn, group Lavann Tradisyon Beau Vallon, e byensir group Tsunami e bann danser group Tanmi.
Selebo ti termin avek en bal lapousyer par Tsunami band e bann artis tel ki Molo, Ahmede e Aaron, apre ankor enn fwa DJ ti zwe pour apepre enn erdtan.
Mandy Bertin
