Mesaz – Lazournen Enternasyonal Lalang ek Kiltir Kreol |28 October 2023
Msye Andre
‘Annou kontinyen mentenir e asir kontinite transmisyon, prezervasyon ek promosyon nou kiltir’
“Ozordi le 28 Oktob 2023 Sesel ek lezot pei kreolofonn pe ankor enn fwa selebre Lazournen Enternasyonal Lalang ek Kiltir Kreol. Sa lazournen i vedir en lokazyon pour nou dekouver oubyen redekouver nou patrimwann lengwistik, kiltirel, literer, mizikal, e savour nou kreolite atraver bann seri aktivite kiltirel ki ilistre en patrimwann ris.
“Sa moman i fer nou selebre Seselwa ki sant kontinyelman son refren ‘Lasezon Kreol in refleri’ e dans lo ler ‘otile lae lae’, leko ek tenmpo vibrasyon tanbour moutya, Morisyen ki fer nou dekouver e savour son pla Bol ranverse ‘the Magic Bol’, Cap Verdyen ki repran refren Ceseria e dans son coladeira, Reinyonnen avek son Maloya, isi lo nou later Kreol. Zot tou zot annan en pwen komen, lalang ek Kiltir Kreol ki zot tou zot partaze. Se sa diversite ki nou pe selebre, sa krwazman kiltir, bann laform ki bann rankont ek lenteraksyon i pran, sa larises kiltirel inepwizab.
“Sa lokazyon i permet nou osi dedye en zour, en semenn, en mwan pour ensit bokou refleksyon atraver bann latelye sansibilizasyon ek lezot linisyativ pour met an valer nou lalang ek nou kiltir seselwa.
“Fodre pa ki nou oubliye ki istorikman e kiltirelman sa selebrasyon ti ne akoz ti annan en bezwen irzan, sa bezwen pour rekonnet lalit lalang ek lidantite bann pep Kreol. Sa lazournen selebrasyon i fri plizyer lannen perseverans, pour en rekonnesans lalang Kreol ziska nivo ofisyel.
“Kiltir i en mwayen rasanbleman. I sinonim ‘viv byen ansanm’ pour en meyer devlopman lasosyete. Atraver ‘Batenm Poupet’, ‘Tifin’, rakontaz ek resital, les nou bann granmoun transmet zot bann konnesans, bann savwar, savwar fer, bann tradisyon, bann koutim… avek nou bann zenn. Sa i ava permet zot dekouver lemonn lepase ek son lanvironnman, tou bann stil lavi, bann valer, bann krwayans, nou bann lenkyetid, en kiltir partaze.
“Lo stad lanmizik e dan tou kwen les bann artis, santer Seselwa transmet nou lalang Kreol ek nou kiltir Seselwa dan zot lar, melodi, lapentir… bann tablo anrisisan.
“Malgre sa losean tirbilan, annou kontinyen mentenir e asir kontinite transmisyon, prezervasyon ek promosyon nou kiltir, tou sa ki anglob bann laspe tre larz lavi nou sosyete ; nou lalang, bann mers, bann moral, fason viv, sistenm bann valer, krwayans, rit relizye, lorganizasyon lafanmir ek bann kominote, bann labiyman, ensideswit.
“Sa 28 Oktob 2023 annou plas nou valer sosyal e kiltirel Seselwa ek lidantite Kreol o sant nou selebrasyon ek devlopman. Annou reviv e senm lanmour, lanmitye, konfyans, kouraz, lafanmir, respe, solidarite, lapartaz, travay, latolerans. Annou les li vin en sours lenspirasyon toulezour.
“Mon profit sa lokazyon pour remersye tou bann militan, kreolist, lengwis, serser, ansenyan, profeser, pour sa latas nob e kontinyel; defans ek promosyon nou lalang ek nou kiltir Seselwa.
«Bonnfet Kreol ! »
David Andre
Sekreter Zeneral Lenstiti Nasyonal pour Kiltir, Leritaz ek Lar