Rali politik parti LDS |23 October 2023

‘Pou annan en keksoz pour tou Seselwa dan Bidze 2024,’ Prezidan Ramkalawan i dir

“I annan en keksoz pour tou Seselwa dan Bidze 2024 ki pou prezante le 3 Novanm dan Lasanble Nasyonal par minis responsab pour finans.

Se prezidan Wavel Ramkalawan ki’n dir sa pandan rali politik son parti Linyon Demokratik Seselwa (LDS) yer dan laplenn Anse Royale, letan i ti pe met lanfaz lo lenportans ki son parti i atase a popilasyon.

Prezidan Ramkalawan ti pe adres en lafoul siporter ki ti’n desann pour sa rali, ki ti’n konmans avek en laserenad loto depi anvil kot ‘car park’ IDC anpasan semen lakot sid.

Sa aktivite ti pe koensid avek trwazan laviktwar LDS dan eleksyon prezidansyel e lasanble nasyonal, ki ti fer zot sorti konman parti mazoriter dan pei.

Dan son ladres, Msye Ramkalawan ti souliny bann lakonplisman ki’n annan dan sa dernyen trwazan pour koup labi, gaspiyaz ek koripsyon an dizan ki la an 2023, “Nou lanmen i prop”, e azoute ki “sak sou ki sa pep i prodwi i met a dispozisyon sa pep”.

I ti koz lo bann lakonplisman dan devlopman lenfrastriktir lo sa trwa zil prensipal, depi semen, por lo Pralen ek nouvo lopital La Digue, rezourd problenm linondasyon Anse Royale ek Anse Boileau, lenvestisman dan ban diferan sekter tel ki lapes, lasante, ledikasyon, pour kontinyelman fer pei avanse e donn popilasyon sa ki meyer.

I ti dir ki konman en gouvernman serye, zot pe kontinyen travay pour amelyor lavi pep Seselwa e parfwa zot bezwen pran bann desizyon ki pa popiler, tel ki aboli ‘unemployment relief scheme’ me selman i bann desizyon ki bezwen pran, pour kapab fer dimoun debout lo zot lipye.

I dir menm si proze i sitan enportan, sa ki depas li se lanfaz ki zot met lo popilasyon.

“Mon ladministrasyon i enn ki pe regard zot e ki pou donn zot lankourazman,” i ti dir letan i ti pe met lanfaz lo lazenes ek travayer e azoute ki lannen prosen si lekonomi i fer byen, travayer pou benefisye.

Dan sa menm laliny i ti azoute ki dan sa bidze ki pe al prezante dan Lasanble Nasyonal dan de semenn, pou annan en keksoz pour tou dimoun.

“Ozordi kot nou ete dan Sesel i moman pour nou met lanfaz lo pozitivite. Fodre nou tou nou vin pli pozitiv, nou koste ansanm, fodre ki nou tou nou rod linite. Tou sa ki nou kapab fer, nou vin devan pour nou fer li akoz apre tou Sesel i nou pei,” Msye Ramkalawan ti azoute.

Yer ti osi annan ladres par trwa lezot manm elekte sa parti dan Lasanble Nasyonal – Sathya Naidoo ki ti met lanfaz lo devlopman e lenportans lazenes, Desheila Bastienne ki ti koz lo kontribisyon ki fanm in fer dan pei, sirtou bann ki dan lasanble e Gervais Henrie ki ti koz lo travay ki parti in fer ziska la, e nesesite ki zot kontinyen dan sa menm laliny e ki zot kontinyen fer sa avek led zot bann siporter. Msye Henrie ti demann pasyans ek konprenezon bann ki santi zot dezapwente akoz i ti rapel zot ki LDS in vin tir en sistenm 43-an, e i pou pran zot en kantite letan pour fer sa transformasyon pour anmenn Sesel lo sa nivo ki zot oule.

Sa rankont yer ti enkli plizyer performans mizikal e i ti termin zis en pti pe apre 6er diswar.

Bann portre i montre enn de moman for sa rasanbleman.

Patsy Canaya

Portre par Joena Meme