Festival Kreol |16 October 2023
Tou ti konmans avek en laserenad
‘Batenm Poupet’ i ankor enn fwa lo kalandriye
Lanbyans ti so menm dan batenm poupet ki ti deroule Sanmdi apremidi kot Restoran Vye Marmit, Domaine de Val des Pres, Au Cap, kot en gran nonm dimoun ti’n desann pour asiste.
Sa levennman, ki ti dan kad aktivite Festival Kreol, ti’n ganny organize par Konsey Nasyonal Resours ek Leritaz Sesel. I en tradisyon ki bann dimoun lotan – zenn konman adilt – ti pratike konman en aktiviite lwazir dan en Dimans apremidi kot sakenn ti vin avek zot diferan kalite poupet pour ganny batize.
Sa i konmans par en laserenad, kot parmi enn oubyen de dan sa bann poupet i vin poupet prensipal pour diriz seremoni batenm. Tou sa bann poupet pour batize i ganny akonpannyen par zot manman, papa, paren ek marenn. Parey dan laplipar batenm, Seselwa i kontan fete e tou sa ki asiste ti bezwen prepar en pti manzay ek rafresisman pour vin avek pour sa selebrasyon ki ale ziska enpe tar dan lannwit.
Sa ti vreman leka kot Domaine de Val des Pres, kot sa batenm ti fer reviv sa levennman ki mannyer i ti ete dan le pase. Ti annan partisipasyon en bon pe zenn ek adilt avek zot diferan kalite poupet tou sort kouler, gro e pti, e byen abiye.
Tou ti konmans avek en laserenad kot bann paran, paren ek marenn sa bann poupet ti parade ek zot poupet an santan avek ler sa bon lanmizkik tradisyonnel ki group ‘Lansiv’ ti pe anvoye.
Poupet prensipal pour sa batenm ti de fir zimel, Teofeline ek Teofelina Marimba. Parey labitid, touzour prezan ti ‘Kezer’ asize dan son fotey. Se li ki ti temwen tou bann batenm poupet ki fer dan kanton. Se per Camille Azemia, alyas ‘Karozen’ ki ti batiz tou bann poupet kot i ti demann zot paran, paren ek marenn pour fer sir ki bann zanfan i swiv byen zot lavi kretyen.
Apre batenm, tou envite ti al swet Teofeline ek Teofelina pour zot sakreman batenm. Apre sa, gato batenm ti ganny koupe e keksoz ti vin pli so ler lasal ti ouver pour danse ki ti ale ziska 6er diswar.
Destiny Nourrice, aze 11-an, sorti dan distrik Plaisance, ti dir ek zournal Seychelles NATION, “Mon byen kontan mon’n vini avek mon poupet. I byen gou. Sa batenm in fer mwan vwar ki mannyer bann dimoun lontan ti anmiz zot. Mon’n osi aprann e tande ki zot ti fer osi bokou lezot zwe ki byen gou. I byen gou pour mwan ozordi. Mon’n ganny sans vwar en kantite kalite poupet e mon byen kontan.”
Lo son par, marenn Teofeline ek Teofelina, Flossy Elisa, 71-an sorti dan distrik Anse Royale, ti dir: “Fodre kontinyen fer bann levennman koumsa. Bokou nou bann zenn pa konnen sa. Fodre ki plis zot i vini pour vwar ki mannyer nou bann vye paran ek adilt ti fer dan lepase. I en kiltir ki pa devret perdi. Mwan mon rapel sa byen, mon ti partisipe ansanm ek mon paran. Pour mwan konman en zanfan sa letan, sa ti vreman gou. Se bann keksoz parey ki anmenm lazwa de viv ki nou pe mank enpe ozordi.”
Teks ek portre par Patrick Joubert
