Festival Kreol   |16 October 2023

Zenn i demontre zot talan sant romans e dans kanmtole dan gran final

Manm piblik ki ti kot Sant Konferans Enternasyonal yer apre midi ti ganny sans dekouver e apresye bann nouvo talan dan ladans kanmtole ek sant romans dan final enterskoler pour sa de konpetisyon ki ti pe deroule dan kad aktivite Festival Kreol.

Sa bann etidyan primer, segonder ek pos segonder abiye dan diferan lenz byen kolore ti fer lasaler monte dan lasal evek lenterpretasyon zot bann diferan form ladans kanmtole e sanson romans ki tou ti an Franse parey labitid.

Bann ladans ki sa bann zenn ti performen ti vals, kotis doub ek avan 4 pour kategori primer, mazok, kotis anglisan e avan 3 pour kategori segonder e polka, dyaz ek galo pour kategori pos segonder.

Bann tit romans ki ti ganny sante par bann zenn santez ti ‘Je suis a ta puissance’, ‘Mes chers amis’ e ‘Nous étions trop heureux’ dan kategori primer, ‘Sous les cieux’, ‘Véritable amour’ ek ‘Charles’ pour kategori segonder e ‘Mon amour s’en va’, ‘Jeune fille’, ‘La grise hirondelle’ ek ‘Mes chers amis’ par pos segonder.

Vi ki non sa bann lekol pa ti ganny mansyonnen pour permet ziri fer en bon zizman, sak lekol ti ganny idantifye par en nimero ek en kouler.

Se nek an Novanm ki nou bann zenn konpetiter pou konnen lekel ki parmi zot, ansanm ek zot lekol, ki gran venker.

“Nou’n deside fer li plitar dan en pti rankont avek zis bann zanfan kot la nou anonse lekel ki’n gannyen. Nou pe fer li koumsa akoz dan lepase letan nou anons rezilta deswit apre konpetisyon, nou toultan vwar bann friksyon e kontrent ki leve kot piblik i zoure akoz zot pa dakor avek rezilta e nou nou vwar sa i pa zoli pour bann zanfan,” Magaret Vel, en manm organizater, ti dir avek Zournal Seychelles NATION.

Bann portre ki akonpanny lartik i montre serten partisipan pandan zot performans dan sa konpetisyon.

Teks ek portre par Patrick Joubert