Kominike Lapolis |14 October 2023
Lakour i donn zizman dan ka lesey en zonm pour anpwazonn en lot
James Azemia, aze 53-an sorti Ma Joie, in kondannen pour ilegalman administre en pwazon avek lentansyon koz dimal en lot dimoun.
Sa lensidan ti ariv le 19 Oktob 2021, Beau Vallon. Sa kondannen ti entansyonnelman met en sibstans dan en boutey labwason ‘dry cherry’, ki tes syantifik ti plitar prouve ti lannet.
I ti answit met sa boutey ‘dry cherry’ lo lans Beau Vallon dan en landrwa kot en group dimoun i abitye frekante. Plitar senk zonm ti konsonm sa labwason e la zot tou zot ti ganny transporte lopital Sesel dan en leta kritik, e menm ganny admit dan younit swen entansif.
Ziz ki ti pe ekout sa ka in pran konsiderasyon apre ki sa kondannen ti’n pled koupab dan premye lenstans e pa gat letan lakour.
Konman santans, Azemia in kondann en term 2-an prizon pour sak sa 5 ka.
Ziz in osi sispann 16 mwan lo sak santans 2-an pour en peryod 3-an.
Lakour in osi ordonnen vi ki Azemia ti’n deza fini deservi en term 8 mwan e 10 zour prizon, sa i kouver letan ki in kondannen alor in aprezan ganny large e ganny deklare en zonm lib.
********
De zonm i kondannen pour andomaz propriyete
Rahim, Marcus Jumaye ek Francis, Randolph Dugasse in kondannen dan 3 ka pour andomaz propriyete.
Sa i pou kase e vole kot plizyer cable kiosk lo Mahé.
Jumaye ek Dugasse in kondann sakenn 4-an prizon e sakenn en lanmann R210,529.50, ki zot pou bezwen peye avan le 1 Desanm 2024.
Sa pou al konman konpansasyon pour sa lakonpannyen anver domaz ki zot in koze lo sa bann cable kiosk.
Si zot pa arive peye zot pou fer en term 28 mwan prizon adisyonnel.
Dan 2 lezot ka separe Rahim, Marcus Jumaye in kondann 4-an prizon pour lofans andomaz propriyete – sa i cable kiosk e pour vol, ki ti arive lo Praslin.
I pou osi pey en lanmann R281,800 avan le 1 Desanm 2025.
Sa i osi konman en konpansasyon pour sa lakonpannyen. Si Jumaye pa arive pey sa lanmann i pou fer en term 32 mwan prizon adisyonnel.
Kominike sorti kot departman lapolis