38enm Festival Kreol |12 October 2023
Tablo bann artis Seselwa e Rodrige i ganny egzibite Kenwyn House
En group 29 artis pe egzibit zot travay dan en legzibisyon apele ‘Portre, Viv an Kreol’ ki ti ofisyelman ouver Mardi apremidi kot Kenwyn House.
Sa levennman ti enn parmi sa seri aktivite ki pe organize dan kad Festival Kreol 2023.
Prezan kot sa seremoni ti Vis-Prezidan Ahmed Afif parmi plizyer lezot envite.
Bann artis ti ganny demande pour demontre fason viv kreol dan son totalite.
Dan son diskour kot seremoni louvertir sa legzibisyon, direkter egzekitiv Lazans Kreativ Sesel, Emmanuel d’Offay, ti fer resorti ki dan sa lemonn globalize, lidantite kiltirel pe vin pli enportan dan kreasyon lar.
Artis pe les zot ganny enspire par diferan sours kiltirel pour kree travay artistik ki reflekte en melanz bann lenfliyans kiltirel, i ti azoute.
“Sa bann diferan lenfliyans kiltirel i kapab anmenn kreasyon bann tablo inik e inovativ ki en refleksyon konpleksite e diversite en sosyete kontanporen.”
“Lar i vin sa katalis ki promouvwar linite e lape e i ofer en rekil pour nou bann problenm toulezour, akoz i les nou al dan en lot lemonn e donn nou en diferan perspektiv,” Msye d’Offay ti dir.
“Lasosyete pa kapab fonksyonnen san lar, akoz lar i reflekte en kiltir vibran. Lar i depas tou frontyer e i reste enn parmi bann zouti ki konnekte limanite nenport ki kote ou ete, e se pour sa rezon ki apre sikse lannen pase, dan premye edisyon legzibisyon lar ki ti ganny enkli dan progranm Festival Kreol, Lazans Kreativ Sesel i prezant dezyenm edisyon anba tenm ‘Portre, Viv an Kreol’.”
Msye d’Offay ti azoute ki sa tenm in defye bann artis pour al an deor zot frontyer, akoz lar i en medyonm pwisan ki sirpas tou teritwar e konnekte dimoun dan diferan parti lemonn.
“Nou rekonnet kontribisyon sa 29 artis ki’n partisipe, e an partikilye nou bann zanmi artis Rodrige. Ankor enn fwa nou war sa lekilib ant bann artis debitan ek bann artis profesyonnel.”
Parmi sa 29 artis, i annan 23 sorti Mahé, enn lo Praslin e senk sorti Rodrigues.
Pandan sa seremoni louvertir, sekreter zeneral Lenstiti Nasyonal pour Kiltir, Leritaz ek Lar Sesel, David Andre, ti osi donn koudanvwa pour sa 38enm Festival Kreol.
Queensley Abdool, en zenn artis sorti Rodrigues ki pratik lar konman son metye, ti koz en pti pe lo son tablo ki pe reprezant en artis renonmen dan lanmizik Rodrige sirtou lanmizik tradisyonnel – sega tanbour.
Tino Samoisy i en militan ki pe promot lanmizik kreol Rodrigues e dan sa tablo i pe demontre son lafyerte pour son kiltir e son lanmizik tradisyonnel.
“Mon’n swazir sa tenm akoz lazenes pe les nou tradisyon perdi e pa pe realize ki sa bann artis ki pe fer sa lanmizik kreol zot annan en lenportans. Alors fodre ki nou pa bliy nou kiltir e ki nou kontinyen promouvwar li pour nou zenn zenerasyon.”
Sa legzibisyon pou ouver pour manm piblik ziska le 11 Novanm.
Bann portre ki akonpanny lartik i montre serten parmi bann travay ki dan legzibisyon.
Mandy Bertin
