Festival Kreol 2023 |12 October 2023
Msye d’Offay ek Manmzel Clarisse pe koup en gato pour konmemor sa levennman
NEkreol ... pa zis en non me en senbol nou lorizin
Bonzour i enn parmi bann mo kreol ki paran i fer sir ki bann pti zanfan i aprann depi a en tre zenn az.
E ki pli meyer ki sa se en paran ki annan son lalang kreol a ker in deside met an valer bann mo kreol lo en seleksyon lenz pti baba.
Anna-Rose Clarisse in lans son koleksyon lenz pti baba ek akseswar apele NEkreol pandan Festival Kreol sa lannen.
Sa ti deroul dan lasal nimero de kot Sant Konferans Enternasyonal Mardi bomaten dan prezans fanmiy, zanmi e lezot envite.
Pandan son diskour i ti fer resorti ki sa i pa zis en biznes lenz pti baba me en vizyon, en parkour avek bokou lanmour, kreativite e larises nou kiltir.
Anna-Rose i rakont nou son parkour...
“Apepre enn an pase, swivan nesans mon zanfan, mon ti vwar mon viz ver bokou lenz pti baba ki pa ti tro relevan avek lantouraz mon pti garson. Zis parey mon ti kestyonn ki desen anime i regarde, ki liv i servi, mon ti osi vin vreman konsyan lo ki lenz i mete e kwa ki sa bann lenz pe promote,” i ti rakonte.
“Alors mon ti konmans fer bann pti kolaz pour son bann moman eksitan pour garni son bann leksperyans ek levennman.”
Apre ki mon’n fer plizyer versyon mon’n war ki bokou dimoun ti’n byen apresye e mon ti konmans ganny demann pour fer. Ti annan en laswaf pour partaz nou kiltir avek zanfan, espesyalman si zot premye langaz maternel ti angle, Manzmel Clarisse ti fer resorti.
“Ti annan en mankman koneksyon, lidantite, e kouler nou bann zil kot ki konsern lenz pti baba e zanfan,” i ti azoute.
Nou bezwen valoriz nou kiltir…
“Souvannfwa nou dir ki nou kiltir pe devalye e sa bann nouvo zenerasyon pa konn son valer. Me nou pa kapab blanm zot, nou bezwen mazinen kwa e ki nou pou fer pour anmenn sa kot zot pour zot angaze a en tre zenn az avek,” i ti dir.
NEkreol ... pa zis en non me en senbol nou lorizin
Sa zenn tre kreativ i fer resorti ki Nekreol pa zis en non, me en senbol nou lorizin, en koneksyon avek nou kiltir, leritaz e langaz, en fason pour rakont zistwar e rekonnet nou lidantite Seselwa e sa labote enkwayab otour nou.
“Nekreol i donn zanfan en labiyman ki relevan e donn ou sa lafyerte. I en loportinite pour entegre dan nou zanfan konfidans dan nou kiltir.”
Lo son kote direkter egzekitiv Lazans Kreativ Sesel, Emmanuel d’Offay, in dir ki NEkreol i merit parmi sa sours lenspirasyon pour bann lezot biznes me osi sa pionye dan promouvwar kiltir e leritaz atraver lanmod ek bann akseswar e ki zot fer Sesel fyer.
Bann lenz ek akseswar NEkreol i anvant kot laboutik Philatelic sitie dan batiman Liberty House e osi lo sit webwww.nekreol.com
Bann portre ki akonpanny lartik i montre serten moman for lansman sa koleksyon lenz pti baba.
Mandy Bertin
Portre par Louis Toussaint
