Moman Kreativite |10 October 2023

Etidyan segonder e pos-segonder i egey lodyans avek zot performans

Apre zanfan lekol primer son Sanmdi pour montre zot talan artistik dan Moman Kreativite, sete tour bann etidyan segonder e pos-segonder pour egey lodyans avek zot diferan performans ladans, sanson, pyes teat e rakontaz zistwar Dimans apremidi kot sant konferans enternasyonal (ICCS).

Sete dan en lasal plen ki sa levennman ki lo kalandriye Festival Kreol toulezan ti deroule pandan 2erd-tan edmi.

Tou lekol segonder dan pei ti prezan, tandiski lo kote pos-segonder, selman Lenstiti Lagrikiltir e Ortikiltir ki pa ti prezan.

Sa lannen pour bann lekol segonder, Plaisance in kalifye tou le kat kategori, e i zwenn avek Beau Vallon pour ladans e Pointe Larue pour kategori sanson.

Lo kote pos-segonder, dan ladans se Lenstiti pour Teknolozi Sesel (SIT) ek Lakademi Tourizm Sesel, e pour sanson i Lakademi Letid Biznes (SBSA) ek Lakademi Maritim Sesel (SMA).

SBSA in osi kalifye pour kategori zistwar ek pyes teat.

Fodre note ki bann pyes teat pandan sa final ti annan bann mesaz avek bokou moral, ensi ki sa kote komik tel ki zistwar soungoula ou menm en lyon ki anvi marye avek en mouton.

Bann danser ek dansez ti osi ganny bokou aplodi par lodyans, tandiski bann ki ti annan rakontaz zistwar ti osi anmenn bokou laplodisman ek sourir.

Tou sa bann performans pou prezante le 22 Oktob dan oditoryonm ICCS.

Prezan kot seremoni Dimans ti enkli Minis pour Ledikasyon, Dr Justin Valentin.

Bann portre ki akonpanny lartik i montre serten performans sa aktivite Dimans apremidi.

Sunny Esparon

Portre par Louis Toussaint