Kominike Lapolis |02 October 2023
En zonm i resevwar swen medikal swivan en aksidan lo scooter
En zonm aze 29-an in ganny transporte Lopital Sesel pour swen medikal apre en aksidan ki ti arive Beau Vallon yer apremidi dan en lale pour antre kot en letablisman touristik.
Sa zonm ki ti lo en scooter ti sorti direksyon Beau Vallon pour al lavil letan ki i ti fer kolizyon avek en transpor ki ti pe fer direksyon Beau Vallon. I ti tonbe e sibir plizyer blesir lo son lekor. Se en zofisye lapolis ki pa ti pe travay sa letan ki ti deswit administre premye swen sirplas lo sa viktim e plitar remet li dan lanmen bann zofisye medikal pour swen pli spesyalize.
Lapolis in konmans en lanket dan sa enn ka.
****
2 fiy i resevwar tretman apre ki zot ti tonm lo semen sorti dan en pick-up
De fiy – enn aze 11-an e lot aze 12-an – in resevwar tretman Lopital Sesel apre plitar ganny large. Sa ti an rezilta en aksidan ki’n arive dan zanmerant Beau Vallon yer apremidi.
Sa 2 fiy ti pasaze deryer dan en pick-up avek zot manm fanmiy. Zot ti sorti deryer lo en sez dan sa pick-up e tonm ater lo semen kot zot ti ganny dimal lo plizyer parti zot lekor. Sa pick-up ti pe sorti Regatta site pour al ver grann rout.
Lapolis in konmans en lanket dan sa enn ka.
Kominike sorti kot departman lapolis