Poenm an lapresyasyon pour ‘Team Seychelles’ dan Zwe De Zil Losean Endyen 2023 |07 September 2023

Si pa zot, dir mwan lekel !!

Dan splander leksitasyon, zot in fer later Malgas tranble

Ini konman en sel fanmiy, zot in reste solid

Solid dan tou disiplin kot zot in konbat avek senserite

Konbat avek lanmour, menm si bokou lenfliyans negatif dan zot zalantour

Sa matirite dan zot patriotizm in reste lafors zot dignite

En nasyon atlet determinen ki’n viv avek bokou lespwar pour demen

Sak nouvo zour, sak nouvo rev, zot in sakrifye pour zot patri byenneme

En sakrifis ki’n fer zot loner, valer prosperite en pep

En pep Kreol ki’n siporte, ki’n priye, ki’n selebre

Wi, nenport ki oter nou paviyon in flote, in ase pour fer bokou leker vibre avek lafyerte

‘Team Seychelles’, anbasader nou kreolite dan diversite sa zwe

Zot kouraz enspire par kouler lemozite, in dekor zot vizaz senplisite, parfimen dan en lanbyans linite

Sa lantouraz kous sosyete, in en levantay kolore ki’n evant zot lelan pour ekspoz zot talan.

Bann talan ki reste inik dan lizye, me dan memwar in touzour grave

Bravo bann fanm ek zonm aksyon, ki’n akonpanny ‘Koste Seselwa’ lo traze zot misyon.

Zot in dekouver bokou sekre atraver ofer lanmitye

Zot in partaz larises nou kiltir lo lakadans losean

Les zot sourir lakonplisman ranplas zot larm dezapwentman

Dan zot vizyon, gard nou zoli Sesel touzour briye

Briye parey en zetwal ki sakenn de zot i ete

Isi lo nou later sakre, nou salye zot lespri pozitivite

Enn ki’n fer Losean Endyen krake e kit mark dan latras zot lepa sikse

Fyer sa ki nou ete, inonde avek lazwa nou pli gran respe

Mersi ‘Team Seychelles’.

Karly Libanotis