Festival Kreol |17 August 2023
(Gos a drwat) Manmzel de Letourdie, Msye D’Offay ek Manmzel Rose pandan konferans lapres yer
Konpetisyon sanson kreol e ladans kontanporen in lanse
Seychelles Creative Agency (SCA) an kolaborasyon avek Konsey Nasyonal pour Lar ek Lartizana in lans en konpetisyon sanson kreol e ladans kontanporen alokazyon Festival Kreol ki pou fer an Oktob.
Sa konpetisyon ti anonse dan en konferans lapres yer par direkter egzekitif SCA, Emmanuel D'Offay, kot Sant Konferans Enternasyonal.
Msye D’Offay i dir rezon pour sa de konpetisyon se pour entrodwir nouvo aktivite dan Festival Kreol e sanson ek ladans i target sirtou bann zenn e konsantre lo lalang kreol.
“Nou anvi donn tou dimoun en loportinite pour partisipe e montre zot talan.»
I dir ki lo kote sanson zot anvi bann mizisyen i konpoz en nouvo sanson oubyen en morso lanmizik kot zot bezwen servi omwen trwa a kat lenstriman tradisyonnel.
«Nou anvi donn valer bann lenstriman tradisyonnel akoz konmela, bokou i servi sentetizer oubyen lezot metod elektronik e nou anvi retourn lo sa latous tradisyonnel.»
Daniella Rose ki ansarz lekol ladans, e osi pe kordin sa konpetisyon ladans, i dir ki dan sa konpetisyon zot anvi ki danser i servi en lanmizik kreol ek ladans pirman kontanporen. Sa konpetisyon i ouver pour dimoun aze 15 a 35-an.
«Nou pe target sa laz pour sa lannen, petet pli tar nou kapab donn sans bann lezot laz pli ba.» Kriter pour bann ladans i fodre ki koreografi i orizinal e ki i pa mwens ki de minit e plis ki trwa minit.
Bann group fodre pa annan plis ki sis danser.
Konpetisyon sanson pe kordinen par Jany de Letourdie. «Mon krwar ki NACC ansanm avek SCA, enn zot manda se pour promouvwar kreolite. Kontrerman avek ladans, nou’n deside pour baz konpetisyon sanson lo semi-profesyonnel ek profesyonnel avek 3-an leksperyans dan fer sanson. Sa i pour asire ki nou ganny en keksoz de kalite,» Manmzel de Letourdie i dir.
Pou annan premye, dezyenm ek trwazyenm pozisyon ki pou ganny pri larzan. Me in ganny devwale ki i annan posibilite kot pou napa okenn gannyan si performans pa satisfer manm ziri. Dernyen dat pour anrezistre i le 11 Septanm.
Diane Larame
Portre par Louis Toussaint