Kominike Lapolis |08 August 2023
Sispe dan 10 ka obtenir larzan lo fo preteks i rimann
En zenm zonm aze 23-an ki pa dan lanplwa sorti Anse à la Mouche in ganny rimann an detansyon lapolis ziska le 21 Out 2023 zour ki i ekspekte repas an kour.
Sa garson i sispe dan 10 ka ki lapolis pe fer lanket ladan pour lofans obtenir larzan lo fo preteks e fer fo dokiman ki’n arive tou resaman.
Lapolis i ankor enn fwa lans en lapel avek manm piblik pour evite tonm dan bann pyez pour fer okenn tranzaksyon larzan avek okenn dimoun enkoni ki napa en biznes ki anrezistre.
*****
Jude Azemia i kondannen pour posesyon en drog kontrole
Jude Azemia aze 31-an sorti Pointe Larue in kondannen dan en ka posesyon en drog kontrole e ziz ki ti pe ekout sa ka in donn li en santans kot i pou bezwen pey en lanmann 10 mil roupi avan le 28 Fevriye 2024, e si i pa peye i pou fer en term 6 mwan prizon.
Azemia ti ganny arete le 10 Mars 2021 par zofisye lapolis dan en loperasyon kot Chetty Flat, Anse Aux Pins e dan son posesyon ti annn 32.95 granm hashish (canabis resin).
Kominike sorti kot departman lapolis