Vis-Prezidan Afif i eksplik prosedir promosyon dan lafors defans |12 July 2023
Vis-Prezidan Ahmed Afif in dir ki kriter pour donn promosyon dan Lafors Defans Sesel i baze selon bann kriter entern anba de klasifikasyon kot enn pour bann zofisye ki pa’n komisyonnen e lot pour zofisye ki’n komisyonnen.
I ti dir sa yer bomaten dan Lasanble Nasyonal swivan en kestyon irzan par dirizan lopozisyon, Onorab Sebastien Pillay, lo ki bann kriter ki pe ganny servi pour promosyon dan lafors defans.
Dan son leksplikasyon, Vis-Prezidan Afif ti fer resorti ki pour zofisye ki pa’n komisyonnen, zot bezwen zwenn bann kondisyon fizik militer, annan en rekonmandasyon sorti kot zot siperyer, pas kriter disiplin, zwenn bann kondisyon fizik medikal, pas lantrennman neseser depandan lo zot ran e ganny evalye baze lo bann rapor entern ki ganny fer detanzantan pandan zot peryod avek militer.
I ti dir ki panel ki evalye promosyon zofisye ki pa’n komisyonnen i konpri ‘chief of staff’, bann zofisye pour lantrennman, zofisye pour devlopman ek resours imen e de zofisye komann.
Pour zofisye ki’n komisyonnen, Vis-Prezidan Afif ti dir ki i bezwen annan en rekonmandasyon sorti kot zot siperyer ki enkli osi plizyer zofisye ki donn zot evaliasyon, zwenn bann kondisyon fizik militer, pas kriter disiplin, zwenn bann kondisyon fizik medikal, ganny evalye lo bann rapor entern ki ganny fer detanzantan pandan zot peryod avek militer enkli leksperyans ek kalifikasyon.
Sa panel ki evalye promosyon zofisye ki’n komisyonnen i ganny konstitye selon ran ki pe ganny konsidere.
I ti fer remarke ki bann zofisye ki lo panel zot osi zot bezwen zwenn serten kriter tel ki letan servis, tes medikal, en bon kondisyon fizik e annan sertifika dan serten domenn spesifik ek leskperyans pour nobou asiz lo panel.
“Desizyon final pour promosyon zofisye ki’n komisyonnen i reste avek komandan an sef Lafors Defans,” Vis-Prezidan Afif ti dir.
Ti annan serten kestyon lo size en lapwentman ki ti’n ganny fer par Prezidan Wavel Ramkalawan resaman kot en sivilyen ti ganny apwente kaptenn dan Lafors Defans e dan son larepons Vis-Prezidan Afif ti dir ki sa ti prerogativ Prezidan ki konsern son sekirite otour li e ki sa lapwentman ti anliny avek polisi Lafors Defans.