Mosyon i demann akter kle pour revwar zot lapros dan lenplimantasyon proze o nivo kominote |06 July 2023
Lasanble Nasyonal ti yer aprouv en mosyon anmennen par manm elekte pour distrik Grand Anse Mahé, Onorab Waven William, ki ti demande ki swivan mank presizyon ek gaspiyaz resours dan lenplimantasyon serten proze e donn servis o nivo kominote, Lasanble i demann ek tou akter kle dan kominote pour kontinyen revwar zot lapros pour ki i annan meyer rezilta.
Sa mosyon ti ganny aprouve par 17 manm Linyon Demokratik Seselwa (LDS) ki ti vot pour, personn pa ti vot kont e 6 manm United Seychelles (US) pa ti vote.
Avan i ti koz lo son mosyon, Onorab William ti eksplike ki ler i pe refer avek partisipasyon bann akter kle dan kominote sa i enkli bann lazans gouvernman, sekter biznes prive e sosyete sivil ki enplike dan bann aktivite dan distrik osi byen ki manm piblik an zeneral konman sitwayen dan bann kominote.
I ti dir ki son mosyon i relye avek konsern e lafason ki bann keksoz pe ganny antreprann o nivo distrik, kot bokou parmi in ganny leve dan bann miting piblik, e osi pour port latansyon ki dan devlopman en pei i touzour annan lespas pour fer progre e pour fer pli byen.
Onorab William ti azoute ki bi son mosyon osi se pour ede pour ki bann ki ganny peye pour rann servis dan kominote, zot ava aret trenn lipye e fer lavi dimoun dan kominote, ki pe rod en solisyon pour zot problenm, vin fasil.
I ti dir ki sitwayen pa fodre kontakte prezidan oubyen minis pour tou keksoz kan anba zot annan otan travayer ki kapab fasilit servis e donn en larepons.
I ti dir ki bann zofisye ki annan en responsabilite pour rann servis pa devret vin en baryer pour anpes dimoun bouz devan me lekontrer.
I ti azoute ki pour amelyor fason ki bann proze dan distrik i ganny fer e pour evit gaspiyaz, i bezwen annan konsiltasyon e enklizyon lotorite distrik avan ki desizyon pour bann tel aktivite o nivo distrik i ganny pran.
“Msye Speaker, mon anvi dir ki sa mosyon in vin devan akoz nou vwar ki i devret annan amelyorasyon e i annan lespas pour nou kapab fer pli byen,” Onorab William ti dir.
Tou bann manm mazoriter LDS ki ti pran laparol ti koz anver mosyon. Zot ti dir ki menm si bokou keksoz pe mars byen dan distrik, i osi annan ki pa pe mars dan benefis bann zabitan e ki bezwen ganny adrese.
Zot ti dir ki serten desizyon ki’n ganny pran pour serten proze dan distrik, sirtou dan lepase, pa’n ganny pran an konsiltasyon avek bann lotorite distrik ek son zabitan e an rezilta bokou pa’n dan benefis sa bann kominote ki fer ki in anmenn bokou gaspiyaz.
Zot ti felisit tou bann ki’n fer zot travay byen ki’n ede satisfer zabitan e evit gaspiyaz.
“Bann ki pe rann servis pa devret vwar dirizan distrik konman bann dimoun ki fer zot per me konman bann dimoun ki anvi travay ansanm avek zot pour fer kominote ek pei bouze. Annou pa rod solisyon ki ti sipoze donnen yer pour nou fer li demen,” Onorab Naddy Zialor ti dir.
Bann manm US ki ti koze pa ti donn sipor sa mosyon. Zot ti dir ki ler gouvernman in vin devan lasanble, zot, bann manm LDS, zot pa donn bann manm US lanmen pour kestyonn li (gouvernman) pour son linefikasite pour aksyonn lo sa bann menm keksoz ki la zot pe rode atraver sa mosyon.
«Si nou ti zwe nou rol parey ti devret ganny fer, pa ti pou bezwen annan en tel mosyon devan lasanble,” Onorab Johan Loze ti dir.
Dernyen pour pran laparol, manm LDS pour distrik Bel Ombre, Sandy Arrisol, ti fer remarke menm si bann manm US pe dir ki zot caucus (LDS) pa demann gouvernman kestyon kontrerman se zot bann manm US ki pa demann kestyon akoz lo ‘order paper’ napa ni mosyon e ni en kestyon anrezistre sorti kot zot.
Dan son konklizyon e parmi serten rekonmandasyon i ti met devan, loter mosyon Onorab William ti demann Prezidan Wavel Ramkalawan pour konsider ankouraz son bann minis oubyen bann sekreter prensipal pour de fwa dan en lannen zwenn dan en konsiltasyon avek lotorite distrik pour vwar e diskit stati bann proze.
I ti fer remarke ki sa i a tir sa travay lour lo prezidan.
Patrick Joubert