VP Afif i eksplik polisi SDF lo rapor okenn lensidan ki enplik sa lorganizasyon |28 June 2023

Vis-Prezidan Ahmed Afif in dir ki i en polisi Lafors Defans Sesel (SDF) ki rapor lo okenn lensidan ki enplik sa lorganizasyon i reste konman zot bann dokiman entern e konfidansyel selman.

Vis-Prezidan Afif ti dir sa devan Lasanble Nasyonal yer bomaten ler i ti pe reponn en kestyon irzan(PNQ) par dirizan lopozisyon Onorab Sebastien Pillay lo akoz SDF pe refize donn lafanmir sa rapor an koneksyon avek lanmor trazik zenn rekrit Chad Payet ki ti arive le 27 Mars sa lannen.

I ti ganny akonpannyen par Sef Lafors Defans, Brigadier Michael Rosette ek Lyetnan Kolonnel Alain Pierre.

Vis-Prezidan Afif ki ti konmans par lo lapar gouvernman ek lafors defans eksprim son kondoleans pour lafanmir Chad osi byen ki pour tou son bann byenneme ek koleg, ti eksplike ki i en protokol militer pour fer en rapor lo bann lensidan parey ki’n arive avek Chad me sa rapor i reste konman en dokiman entern e konfidansyel pour sa lafors.

“Annefe, lafanmir Chad zot ti ganny sans pour zot vwar sa rapor enkli lezot dokiman medikal dan prezans zofisye SDF. Zot pa’n ganny en kopi sa rapor parey mon’n dir, sa se bann dokiman entern,” Vis-Prezidan Afif ti dir.

Ler i ti pe reponn kestyon bann manm, Vis-Prezidan Afif ti fer remarke ki anvi polisi ki anplas kot rapor pa kapab ganny donnen, SDF ek komandan an sef, Prezidan Wavel Ramkalawan, ki osi en zanmi lafanmir, i pare pour zwenn ankor avek lafanmir nenport ki ler ki zot pare pour diskit nenport ki laspe lanmor Chad avek bi pour ed zot pour rod en ‘closure’ e pour kontiny zot lavi apre sa traze douloure.

Vis-Prezidan ti dir ki Chad ti’n fer tou son bann preparasyon avan ki i ti zwenn lafors konman en rekrit. I ti dir ki sete son prop kouzen ki ti a pe donn lantrennman sa zour ki ti premye dimoun pour apros Chad ler i ti’n tonbe.

I ti azoute ki tou lanket dan lanmor Chad ti ganny fer par en bord ki’n osi fer zot rekonmandasyon lo kwa ki militer i kapab fer pour evit bann risk ki kapab arive.

I ti eksplike ki Chad, ki ti annan zis kat zour konman en rekrit, ti fer en tes medikal e ganny deklare fit, me li (VP) i ti napa okenn lenformasyon lo ki kalite tes ki Chad ti’n fer.

Vis-Prezidan Afif ti dir ki fanmir Chad i annan akse avek tou lalwa pour rod lenformasyon e si zot fer en demann ofisyel, ki pour lemoman napa, pour lenformasyon konsernan sa lensidan, zot pou ganny trete selon lalwa ki anplas.

I ti azoute ki menm si lafanmir ti vwar sa rapor, si zot anvi en kopi, zot annan drwa pour demande e sa pou bezwen ganny fer toutan respektan lalwa ki anplas.

“Nou napa nanryen pour kasyet, nou pa anvi fer ditor personn e annefe nou sagrinen par sa lensidan parske i ti en zanfan ki ti fit e tou dimoun ti vwar li fit. Ler i ti vin fer son tes tou ti vwar fit, for e kapab e determinen pour li travay,” Vis-Prezidan ti dir.

I ti note ki maler pa averti parfwa e ki i ariv dan plizyer lenstans kot personn pa swete e ki fanmir Chad in ganny tou lenformasyon ki kontyen dan sa rapor.

Lo kote kouvertir lasirans pour bann rekrit, Brigadye Rosette ti dir ki napa okenn kouvertir lasirans pour bann rekrit anvi natir travay militer ki bann lakonpannyen lasirans pa kouver.

Fodre fer remarke ki parmi lodyans ki ti pe swiv sesyon lasanble dan galeri ti manman Chad, Maryse Payet. Chad ti pou ganny 19-an ozordi le 28 Zen.

 Patrick Joubert