PMC i konplet travay lo proze desarz ‘housing estate’ Roche Bois |20 June 2023
‘Housing estate’ Roche Bois i aprezan konekte avek sistenm desarz PUC
‘Housing estate’ Roche Bois i en blok flat avek 8 unit 2 lasanm ki ti ouver an 2004. Avek letan sistenm desarz ti fel e sa ti en gran lenkonvenyans pour bann zabitan e osi lanvironnman sa landrwa. An rezilta, PMC ti bezwen pey servis ponpe lo en baz regilye.
An Septanm 2022, tender ti ganny fer pour en proze pour konekte desarz sorti lo sa ‘estate’ lo laliny desarz PUC e travay ti konmanse de mwan plitar par Dean Builders.
Apre set mwan travay entans, avek GIBBS konman konsiltan, sa proze in aprezan konplete. I’n finanse antyerman par PMC e in ariv anviron 1.9 milyon roupi.
Depite sef egzekitiv PMC, Steve Mussard, i dir ki proze in ganny antreprann byen, san okenn problenm mazer e kontrakter in reisi konplet proze dan sa dele letan ki ti dan kontra.
Sa i vedir ki PMC pe kontinyen fer progre pour adres bann problenm desarz dan bann ‘housing estate’ e konplisyon sa enn proze i vedir ki ankor en ‘estate’ i ganny tire lo lalis ki bezwen ganny ponpe.
Byensir, sa pou anmenn ankor benefis finansyer pour PMC.
PMC pe ansemoman travay ankor lo bann ‘design’ pour bann lezot proze dan bann ‘housing estate’.
En kontribisyon